ചെറുവത്തൂര്‍ (കാസര്‍കോട്): മുട്ടത്തൊടി സര്‍വ്വീസ് സഹകരണ ബാങ്കില്‍ നടന്ന മുക്കുപണ്ടപണയ തട്ടിപ്പ് മാതൃകയില്‍ പിലിക്കോട് സര്‍വ്വീസ് സഹകരണ ബാങ്കിലും മുക്കുപണ്ട പണയ തട്ടിപ്പ്. മുക്കുപണ്ടം പണയം വെച്ച് 70 ലക്ഷം രൂപ തട്ടിയിട്ടുണ്ടാവുമെന്നാണ് ബാങ്കില്‍ നടത്തിയ പ്രാഥമിക കണക്കെടുപ്പില്‍ മനസിലാവുന്നത്. സഹകരണ വകുപ്പ് ഉദ്യോഗസ്ഥര്‍ ബേങ്കില്‍ ഇന്നും പരിശോധന നടത്തുകയാണ്.

മുട്ടത്തൊടി ബാങ്കില്‍ മുക്കുപണ്ടം പണയംവച്ച് കോടികള്‍ തട്ടിയെടുത്ത സംഭവം പുറത്തുവന്നതിനെ തുടര്‍ന്ന് സഹകരണ വകുപ്പ് നിയോഗിച്ച ഉദ്യോഗസ്ഥര്‍ നടത്തിയ പരിശോധനയിലാണ് പിലിക്കോട് സര്‍വ്വീസ് സഹകരണ ബാങ്കിന്റെ കാലിക്കടവ് ശാഖയിലും തട്ടിപ്പ് നടത്തിയതായി കണ്ടെത്തിയത്. 18 ഓളം പേരുടെ പേരില്‍ ബാങ്കില്‍ മുക്കുപണ്ടമായ തിരൂര്‍ പൊന്ന് പണയംവച്ചാണ് ലക്ഷങ്ങള്‍ തട്ടിയെടുത്തത്.

ബുധനാഴ്ച്ചയാണ് സഹകരണ വകുപ്പ് ഉദ്യോഗസ്ഥര്‍ പിലിക്കോട് സഹകരണ ബാങ്കിന്റെ കാലിക്കടവ് ശാഖയില്‍ പരിശോധന തുടങ്ങിയത്. ആദ്യ ദിവസത്തെ പരിശോധനയില്‍ തന്നെ തട്ടിപ്പ് കണ്ടെത്തിയതയാണ് സൂചന. അതിനിടെ ബാങ്ക് മാനേജര്‍ ഇന്നും ബാങ്കിലെത്തിയിട്ടില്ല. ബാങ്ക് മാനേജരെ കാണാനില്ലെന്ന് കാണിച്ച് അസിസ്റ്റന്റ് രജിസ്ട്രാര്‍ ചന്തേര പൊലിസില്‍ പരാതി നല്‍കിയിട്ടുണ്ട്.

മുക്കുപണ്ടം പണയം വെച്ച് കാസര്‍കോട് വിദ്യാനഗറില്‍ പ്രവര്‍ത്തിക്കുന്ന മുട്ടത്തൊടി ബാങ്കില്‍ മാനേജരുടെയും അപ്രൈസറുടെയും സഹായത്തോടെ മുക്കുപണ്ടം പണയം വെച്ച് കോടികള്‍ തട്ടിയ സംഭവത്തിനു പിന്നാലെയാണ് പിലിക്കോട് ബാങ്കിലെ തട്ടിപ്പും പുറത്തുവന്നിരിക്കുന്നത്. മുട്ടത്തൊടി ബാങ്കിലെ തട്ടിപ്പു സംഭവത്തില്‍ ബാങ്കിലെ മാനേജരും അപ്രൈസറുമടക്കം ആറുപേരെ പൊലിസ് അറസ്റ്റ് ചെയ്തിട്ടുണ്ട്. സഹകരണ ബാങ്ക് ജീവനക്കാരുടെ പരിശോധന ജില്ലയിലെ ബാങ്കുകളില്‍ നടക്കുകയാണ്.