ഈരാറ്റുപേട്ട: തീക്കോയി ടൗണിന് സമീപം ആന ഇടഞ്ഞു. അയ്യമ്പാറ റോഡില്‍ കടുക്കാസിറ്റിയ്ക്ക് സമീപം നാഗപ്പാറയിലാണു സംഭവം. കോട്ടയം സ്വദേശിയുടെ ഉടമസ്ഥതയിലുള്ള ചന്നാനിക്കാട് വിജയസുന്ദറെന്ന വിജയന്‍ ആണ് ഇടഞ്ഞത്.
ഇന്നലെ രാവിലെയാണ് ഇവിടെ പുരയിടത്തില്‍ തടിപിടിക്കാനായി ആനയെ എത്തിച്ചത്. 10 മണിയോടെ പിണങ്ങിയ ആന പാപ്പാനെ അനുസരിക്കാന്‍ കൂട്ടാക്കാതെ നിലയുറപ്പിക്കുകയായിരുന്നു. ഇവിടെ നിന്നിരുന്ന നിരവധി മരങ്ങള്‍ ആന മറിച്ചിട്ടു. പാറക്കെട്ടിനു സമീപം നിലയുറപ്പിച്ച ആന താഴേയ്ക്ക് കല്ലുകളും മരത്തടികളും വലിച്ചെറിയുകയും ചെയ്തു.
സംഭവമറിഞ്ഞു പ്രദേശവാസികളായ നിരവധിപേര്‍ സ്ഥലത്തെത്തിയിരുന്നു. മണിക്കൂറുകള്‍ക്കുശേഷവും ആനയെ തളയ്ക്കാനായിട്ടില്ല. കാലില്‍ കുരുക്കിടാനെത്തിയവരെ ആന വിരട്ടിയോടിക്കുകയും ചെയ്തു.
ഈരാറ്റുപേട്ട പൊലിസ് സബ് ഇന്‍സ്‌പെക്ടറുടെ നേതൃത്വത്തില്‍ പൊലിസ് സംഘവും ഫയര്‍ഫോഴ്‌സും സ്ഥലത്തെത്തി. ആനയെ വൈകിട്ടോടെ പാപ്പാന്മാര്‍ ചേര്‍ന്നു തളയ്ക്കുകയായിരുന്നു..