ന്യൂഡല്‍ഹി: സേവിങ്‌സ് അക്കൗണ്ടുകളില്‍ പ്രതിമാസ മിനിമം ബാലന്‍സ് നിലനിര്‍ത്തണമെന്ന നിബന്ധന എസ്.ബി.ഐ പിന്‍വലിച്ചു. ഇന്നലെ പുറത്തിറക്കിയ പത്രക്കുറിപ്പിലൂടെയാണ് എസ്.ബി. ഐ ഇക്കാര്യം അറിയിച്ചത്. 44.51 കോടി സേവിങ് ബാങ്ക് അക്കൗണ്ട് ഉടമകള്‍ക്കും ഈ തീരുമാനം ഗുണകരമാകും.
ഓരോ മൂന്ന് മാസം കൂടുമ്പോഴും അക്കൗണ്ട് ഉടമകള്‍ക്ക് ഏര്‍പ്പെടുത്തിയിരുന്ന എസ്.എം.എസ് ചാര്‍ജും എസ്.ബി.ഐ നിര്‍ത്തലാക്കിയിട്ടുണ്ട്. എല്ലാ സേവിങ് അക്കൗണ്ടുകളുടെയും വാര്‍ഷിക പലിശ മൂന്നു ശതമാനമായി നിജപ്പെടുത്തിയതായി എസ്.ബി.ഐ അറിയിച്ചു. നേരത്തെ ലക്ഷത്തില്‍ താഴെ ബാലന്‍സുള്ള അക്കൗണ്ടുകള്‍ക്ക് 3.25 ശതമാനവും ലക്ഷത്തിനു മുകളിലുള്ളവര്‍ക്ക് മൂന്നു ശതമാനവുമായിരുന്നു പലിശ നിരക്ക്.
നിലവില്‍ മെട്രോ, അര്‍ധ മെട്രോ, ഗ്രാമപ്രദേശങ്ങള്‍ എന്നിങ്ങനെ തിരിച്ച് യഥാക്രമം 3000, 2000, 1000 എന്നിങ്ങനെയാണ് എസ്.ബി.ഐ മിനിമം ബാലന്‍സ്. മിനിമം ബാലന്‍സില്ലാത്ത അക്കൗണ്ടുകളില്‍ നിന്ന് അഞ്ചു രൂപ മുതല്‍ 15 രൂപ വരെ പിഴയും ഈടാക്കിയിരുന്നു.