കോഴിക്കോട്: 'മാനവികതക്ക് ഒരു ഇശല്‍ സ്പര്‍ശം' പ്രമേയത്തില്‍ കേരള മാപ്പിള കലാ അക്കാദമി ജില്ലാ സമ്മേളനം നാലിനു കൊടുവള്ളിയില്‍ നടക്കും. ഉച്ചയ്ക്ക് 2.30ന് കമ്മ്യൂണിറ്റി ഹാളില്‍ നടക്കുന്ന പ്രതിനിധി സംഗമം സംസ്ഥാന ജനറല്‍ സെക്രട്ടറി ആരിഫ് കാപ്പില്‍ ഉദ്ഘാടനം ചെയ്യും. ജില്ലാ ജനറല്‍ സെക്രട്ടറി നൗഷാദ് വടകരയുടെ അധ്യക്ഷതയില്‍ സി.കെ തോട്ടക്കുനി വിഷയമവതരിപ്പിക്കും. വൈകിട്ട് 4.30ന് മാപ്പിളപ്പാട്ട് ആലാപന മത്സരം നടക്കും. രാത്രി ഏഴിനു സാംസ്‌കാരിക പൊതുസമ്മേളനം സംസ്ഥാന പ്രസിഡന്റ് പി.എച്ച് അബ്ദുല്ല മാസ്റ്റര്‍ ഉദ്ഘാടനം ചെയ്യും. മൂസ എരഞ്ഞോളി മുഖ്യാതിഥിയാകും. ഫൈസല്‍ എളേറ്റില്‍ മുഖ്യപ്രഭാഷണം നടത്തും. യോഗത്തില്‍ ജില്ലാ പ്രസിഡന്റ് എം.കെ അഷ്‌റഫ്, സ്വാഗതസംഘം ചെയര്‍മാന്‍ ടി. മൊയ്തീന്‍ കോയ സംബന്ധിച്ചു.