പാലക്കാട്: പാലക്കാട് ഉപതെരഞ്ഞെടുപ്പില്‍ വിജയം ഉറപ്പിച്ച് കോണ്‍ഗ്രസ് സ്ഥാനാര്‍ഥി രാഹുല്‍ മാങ്കൂട്ടത്തില്‍. 18198 വോട്ടിന്റെ ഭൂരിപക്ഷത്തിലാണ് രാഹുല്‍ മാങ്കൂട്ടത്തില്‍ വിജയമുറപ്പിച്ചിരിക്കുന്നത്. ബി.ജെ.പിയുടെ കോട്ടകള്‍ ഇളക്കിയാണ് രാഹുലിന്റെ ഈ റെക്കോര്‍ഡ് വിജയം. മുന്‍ഗാമിയായ ഷാഫി പറമ്പില്‍ പൊതുതെരഞ്ഞെടുപ്പില്‍ നേടിയതിന്റെ മൂന്നിരട്ടിയോളം ഭൂരിപക്ഷം നേടിയാണ് രാഹുല്‍ നിയമസഭയിലേക്കെത്തുന്നത്. 

സ്ഥാനാര്‍ഥി പ്രഖ്യാപനത്തിന് പിന്നാലെ ഷാഫിയുടെ നോമിനിയാണ രാഹുലെന്ന് കോണ്‍ഗ്രസിനുള്ളില്‍ നിന്നുള്‍പ്പെടെ ആക്ഷേപമുയര്‍ന്നിരുന്നു. രാഹുലിനെ സ്ഥാനാര്‍ഥിയായി പ്രഖ്യാപിച്ചതിന് പിന്നാലെ പി സരിന്‍ പാര്‍ട്ടി വിട്ടതും എ.കെ ഷാനിബ് സ്വതന്ത്രനായി മത്സരിക്കാന്‍ തീരുമാനിച്ചതുമെല്ലാം വിവാദമായി. പാലക്കാട് ഡിസിസിയിലെ അതൃപ്തി പരസ്യമായതോടെ, പ്രതിപക്ഷ നേതാവടക്കം രാഹുലിനെ പിന്തുണച്ചതോടെ ആവശ്യം അംഗീകരിക്കപ്പെട്ടു. രാഹുലിന്റെ സ്ഥാനാര്‍ഥിത്വം തെറ്റിയില്ലെന്നതിന് തെളിവാണ് ഇന്ന് രാഹുലിന് ലഭിച്ചിരിക്കുന്ന ഭൂരിപക്ഷം. 

പോസ്റ്റല്‍ വോട്ടുകള്‍ എണ്ണിത്തുടങ്ങിയത് മുതല്‍ ബി.ജെ.പി സ്ഥാനാര്‍ഥിയുമായി ഇഞ്ചോടിഞ്ച് മത്സരം കാഴ്ച്ചവെച്ചെങ്കിലും പിന്നാലെ ബി.ജെ.പി കോട്ടകളടക്കം പൊളിച്ചടുക്കിയുള്ള രാഹുലിന്റെ കുതിപ്പാണ് കണ്ടത്. ഇടതു സ്വതന്ത്ര സ്ഥാനാര്‍ഥി സരിന് ഒരിക്കല്‍ പോലും രണ്ടാം സ്ഥാനത്തെത്താനായില്ല. സരിന്‍ നേടിയതിന്റെ ഇരട്ടി വോട്ടുകള്‍ നേടിയാണ് രാഹുലിന്റെ വിജയം.