അലങ്കാര പക്ഷികള്‍ക്കും നഷ്ടപരിഹാരം 

പരിഗണനയില്‍ 

മലപ്പുറം: പക്ഷിപ്പനിയെ തുടര്‍ന്ന് കോഴികളെ നഷ്ടമായവര്‍ക്കുള്ള നഷ്ടപരിഹാര തുക ഈ മാസം 31നകം  തന്നെ വിതരണം ചെയ്യുമെന്ന് മൃഗസംരക്ഷണ വകുപ്പ് മന്ത്രി  കെ. രാജു പറഞ്ഞു. മലപ്പുറം കലക്ടറേറ്റില്‍ നടന്ന പ്രത്യേക അവലോകന യോഗത്തിനു ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. രണ്ടു  മാസം വരെ പ്രായമുള്ള കോഴിക്കുഞ്ഞിനു 100 രൂപ, രണ്ടു മാസത്തിനു മുകളിലുള്ളതിനു 200 രൂപ എന്നിങ്ങനെയായിരിക്കും കര്‍ഷകര്‍ക്കു നല്‍കുക. അലങ്കാര പക്ഷികളെയും കൊന്നിട്ടുള്ളതിനാല്‍ അതിനും നഷ്ടപരിഹാരം നല്‍കുന്നതു കൂടി സര്‍ക്കാറിന്റെ പരിഗണനയിലാണ്. രോഗം റിപ്പോര്‍ട്ട് ചെയ്ത പ്രദേശത്തെ ഒരു കിലോമീറ്റര്‍ ചുറ്റളവിനുള്ളില്‍ പക്ഷിപ്പനി മൂലം ചത്ത കോഴികള്‍ക്കും നഷ്ടപരിഹാരം നല്‍കും. ഇതിനുള്ള നടപടികള്‍ 31നകം സ്വീകരിക്കും.

   പക്ഷിപ്പനി റിപ്പോര്‍ട്ട് ചെയ്ത പ്രദേശത്തിന് ഒരു കിലോമീറ്റര്‍ ചുറ്റളവിനുള്ളിലെ എല്ലാ പക്ഷികളെയും കൊന്നൊടുക്കുന്ന നടപടികള്‍ പുരോഗമിക്കുകയാണ്. ഈ പ്രദേശത്തിനു പത്തു കിലോമീറ്റര്‍ ദൂരപരിധിയിലുള്ള സ്ഥലങ്ങളാണ് ഐസൊലേറ്റഡ് മേഖല. ഈ ഭാഗങ്ങളിലേക്കു മൂന്നു മാസക്കാലം പക്ഷികളെ കൊണ്ടുവരുന്നതും  ഇവിടെനിന്നും പുറത്തേക്കു കൊണ്ടുപോവുന്നതും നിരോധിക്കും. പക്ഷിപ്പനി കണ്ടെത്തിയ പ്രദേശത്ത് നിന്ന് 15 ദിവസം ഇടവിട്ട് സാംപിളെടുത്ത് പരിശോധന തുടരും. മൂന്നു മാസകാലം ഈ നിയന്ത്രണങ്ങള്‍ നിലനില്‍ക്കും. മലപ്പുറത്ത് മറ്റു പ്രദേശങ്ങളില്‍  കാക്കകളും ചത്തതായി നേരത്തെ റിപ്പോര്‍ട്ട് ചെയ്തിരുന്നു. ഇതിന്റെ സാംപിളുകള്‍ ശേഖരിച്ചു പരിശോധനക്കായി അയച്ചിട്ടുണ്ട്. ഫലം വന്ന ശേഷം തുടര്‍ നടപടികള്‍ കൈക്കൊള്ളുമെന്നും മന്ത്രി പറഞ്ഞു.