അടിമാലി: അമിത വേഗതയില്‍ വാഹനമോടിച്ച ചലച്ചിത്രതാരം ബാബുരാജിന്റെ മകന്‍ അക്ഷയ്ക്ക് (24) അടിമാലി പൊലിസിന്റെ ശിക്ഷാ നടപടി. ഇന്നലെ രാവിലെ 11.30 ഓടെയാണ് സംഭവം.
കൊച്ചി - ധനുഷ്‌ക്കോടി ദേശിയപാതയിലൂടെ അമിത വേഗതയില്‍ എത്തിയ കെ എല്‍ 51 ജെ 7 ബി.എം.ഡബ്യു കാര്‍ പത്താംമൈലിന് സമീപം വേഗപരിശോധന നടത്തിയിരുന്ന പൊലിസുകാര്‍ നിര്‍ത്താന്‍ ആവശ്യപ്പെട്ടു. എന്നാല്‍ ഇതിന് മുതിരാതെ അക്ഷയ് വാഹനമോടിച്ച് പോയി. ഇതോടെ മറ്റെന്തോ നിഗൂഢതയുണ്ടെന്ന സംശയം പൊലിസിലുയര്‍ന്നു. തുടര്‍ന്ന് അടിമാലി സ്‌റ്റേഷനിലേക്ക് നല്‍കിയ വിവരത്തിന്റെ അടിസ്ഥാനത്തില്‍ അടിമാലി സെന്‍ട്രല്‍ ജങ്ഷനില്‍ പൊലിസ് ബി.എം.ഡബ്യു കാര്‍ തടഞ്ഞു. യുവാവിനെ വാഹനത്തില്‍ തന്നെ അടിമാലി സ്റ്റേഷനില്‍ എത്തിച്ചു. തുടര്‍ന്ന് പൊലിസ് വിവരങ്ങള്‍ ആരാഞ്ഞതോടെയാണ് യുവാവ് ചലച്ചിത്ര താരം ബാബുരാജിന്റെ മകനാണെന്ന്് ബോധ്യപ്പെട്ടത്. സംശയാസ്പദമായൊന്നും വാഹനത്തില്‍ കണ്ടെത്താനായില്ല.
തുടര്‍ന്ന് അമിത വേഗതക്ക് 500 രൂപ പിഴ ഈടാക്കി യുവാവിനെ മടക്കി അയച്ചു.പൊലിസ് വാഹനം നിര്‍ത്താന്‍ ആവശ്യപ്പെട്ടത് താന്‍ കണ്ടിരുന്നില്ലെന്ന് യുവാവ് പ്രതികരിച്ചു.