ലണ്ടന്‍: അര്‍ജന്റീനന്‍ താരം സെര്‍ജിയോ അഗ്യൂറോയുടെ ഹാട്രിക്കിന്റെ കരുത്തില്‍ മാഞ്ചസ്റ്റര്‍ സിറ്റി 3-1 എന്ന സ്‌കോറിന് ആഴ്‌സനലിലെ തകര്‍ത്തു. നിര്‍ണായക മത്സരത്തില്‍ ജയം കണ്ടെത്തിയതോടെ സിറ്റി വീണ്ടും കിരീട പ്രതീക്ഷയില്‍ നില്‍ക്കുന്ന ലിവര്‍പൂളിന് ഭീഷണിയായി. ഒന്ന്, 44, 61 മിനുട്ടുകളിലായിരുന്നു അഗ്യൂറോയുടെ ഗോളുകള്‍. ലോറെന്റെ കോസിയെന്‍ലിയാണ് ആഴ്‌സനലിന്റെ ആശ്വാസഗോള്‍ നേടിയത്. ഈ ജയത്തോടെ ലീഗില്‍ തലപ്പത്തുള്ള ലിവര്‍പൂളുമായുള്ള അകലം സിറ്റി രണ്ടണ്ടു പോയിന്റാക്കി കുറച്ചു.

റയലിന് ജയം

സ്പാനിഷ് ലീഗില്‍ കരുത്തരായ റയല്‍ മാഡ്രിഡ് 3-0ന് അലാവസിനെ കെട്ടുകെട്ടിച്ചു. കരീം ബെന്‍സെമ (30), വിനീഷ്യസ് ജൂനിയര്‍ (80), മരിനായോ ഡയസ് (90) എന്നിവരാണ് റയലിന്റെ സ്‌കോറര്‍മാര്‍. ബ്രസീലിന്‍ താരമായ വിനീഷ്യന്‍ ജൂനിയറിന്റെ റയലിന് വേണ്ടിയുള്ള ആദ്യ ഗോളായിരുന്നു ഇന്നലെ പിറന്നത്. മറ്റൊരു മത്സരത്തില്‍ പോയിന്റ് പട്ടികയിലെ രണ്ടണ്ടാംസ്ഥാനക്കാരായ അത്‌ലറ്റികോ മാഡ്രിഡിനെ റയല്‍ ബെറ്റിസ് 1-0ന് അട്ടിമറിച്ചു. കളിയിലുടനീളം പൊരുതിക്കളിച്ചിട്ടും സിമയോണിയുടെ കുട്ടികള്‍ക്ക് ഗോള്‍ കണ്ടെത്താനായില്ല. 65-ാം മിനുട്ടില്‍ പെനാല്‍റ്റിയില്‍നിന്നാണ് ബെറ്റിസ് ഗോള്‍ കണ്ടെത്തിയത്. പരാജയത്തോടെ അത്‌ലറ്റിക്കോയും ബാഴ്‌സയും തമ്മിലുള്ള പോയിന്റ് വിത്യാസം ആറായി. 22 വീതം മത്സരങ്ങളില്‍ നിന്ന് ബാഴ്‌സക്ക് 50 ഉം അത്‌ലറ്റിക്കോക്ക് 44 പോയിന്റുമാണുള്ളത്. മൂന്നാം സ്ഥാനത്തുള്ള റയല്‍ മാഡ്രിഡിന് 42 പോയിന്റുമുണ്ട്. മറ്റൊരു മത്സരത്തില്‍ എതിരില്ലാത്ത മൂന്ന് ഗോളുകള്‍ക്ക് എയ്ബര്‍ ജിറോണയെ തകര്‍ത്തു.