കൊച്ചി: അങ്കമാലിയില്‍ ലഹരിവേട്ട. 200 ഗ്രാം എം.ഡി.എം.എയും പത്ത് ഗ്രാം എക്‌സ്റ്റെസിയുമായി യുവതി ഉള്‍പ്പെടെ മൂന്നുപേരെ അങ്കമാലി പൊലിസ് അറസ്റ്റ് ചെയ്തു. സൗത്ത് ഏഴിപ്രത്ത് താമസിക്കുന്ന മുരിങ്ങൂര്‍ കരുവപ്പടി മേലൂര്‍ തച്ചന്‍കുളം വീട്ടില്‍ വിനു (38), അടിമാലി പണിക്കന്‍ മാവുടി വീട്ടില്‍ സുധീഷ് (23), തൃശൂര്‍ അഴീക്കോട് അക്കന്‍ വീട്ടില്‍ ശ്രീക്കുട്ടി (22) എന്നിവരാണ് പിടിയിലായത്. റൂറല്‍ ജില്ല ഡാന്‍സാഫ് ടീമും, അങ്കമാലി പൊലിസും സംയുക്തമായി നടത്തിയ ഓപ്പറേഷനിലാണ് യുവാക്കള്‍ കുടുങ്ങിയത്. 

ജില്ല പൊലിസ് മേധാവി ഡോ. വൈഭവ് സക്‌സേനയ്ക്ക് ലഭിച്ച രഹസ്യവിവരത്തെതുടര്‍ന്ന് പൊലിസ് പരിശോധന കര്‍ശനമാക്കിയിരുന്നു. അമിത വേഗത്തിലെത്തിയ ബൊലേറോ വാഹനം ടിബി ജങ്ഷനില്‍വെച്ച് പൊലിസ് സാഹസികമായി തടഞ്ഞുനിര്‍ത്തി. വാഹനത്തിന്റെ ഡ്രൈവര്‍ സീറ്റിന് പുറകുവശത്ത് ഉള്ളിലായി 11 പ്രത്യേക പാക്കറ്റുകളില്‍ ഒളിപ്പിച്ച നിലയിലായിരുന്നു മയക്കുമരുന്ന്. ഇതിന് ലക്ഷങ്ങള്‍ വിലമതിക്കുമെന്നാണ് പൊലിസ് വിലയിരുത്തല്‍. 

ബെംഗളൂരുവില്‍ നിന്നാണ് സംഘം മയക്ക് മരുന്നുമായി എത്തിയത്. എം.ഡി.എം.എയേക്കാളും അപകടകാരിയാണ് എക്‌സെറ്റസി. ഡാന്‍സാഫ് ടീമിന് പുറമെ ഡിവൈഎസ്പിമാരായ പി.പി. ഷംസ്, ടി.ആര്‍ രാജേഷ്, ഇന്‍സ്‌പെക്ടര്‍ ആര്‍.വി അരുണ്‍ കുമാര്‍, എസ്.ഐമാരായ ജയപ്രസാദ്, കെ. പ്രദീപ് കുമാര്‍, എ.എസ്.ഐമാരായ ഇഗ്നേഷ്യസ് ജോസഫ്, പി.വി ജയശ്രീ, സീനിയര്‍ സിപിഒമാരായ ടി.ആര്‍ രാജീവ്, അജിത തിലകന്‍, എം.എ വിനോദ് എന്നിവരും സംഘത്തിലുണ്ടായിരുന്നു.

Drug bust in Angamaly 200 grams of MDMA and ten ecstasy were seized Three people including the woman were arrested