ന്യൂഡല്‍ഹി: മണിപ്പൂരില്‍ നിയമസഭാ തെരഞ്ഞെടുപ്പില്‍ കോണ്‍ഗ്രസ് ടിക്കറ്റില്‍ മത്സരിച്ച് വിജയിച്ച ശേഷം ബി.ജെ.പിയില്‍ ചേര്‍ന്നു മന്ത്രിയായ നേതാവിനെ മന്ത്രിസ്ഥാനത്തുനിന്ന് നീക്കി സുപ്രിം കോടതി. മണിപ്പൂര്‍ വനം മന്ത്രി തൗനാജം ശ്രാംകുമാര്‍ സിങ്ങിനെയാണ് സുപ്രിം കോടതി നീക്കിയത്. ഇനി കോടതി നിര്‍ദേശിക്കുംവരെ ഇദ്ദേഹം നിയമസഭയില്‍ പ്രവേശിക്കുന്നതും കോടതി വിലക്കിയിട്ടുണ്ട്. 

ജസ്റ്റിസ് ആര്‍.എഫ് നരിമാന്‍, ജസ്റ്റിസ് എസ്. രവീന്ദ്ര ഭട്ട് എന്നിവരടങ്ങുന്ന സുപ്രിം കോടതി ബെഞ്ചാണ് വിഷയത്തില്‍ വിധി പുറപ്പെടുവിച്ചത്. 2017ല്‍ കോണ്‍ഗ്രസ് ടിക്കറ്റില്‍ മത്സരിച്ച് വിജയിച്ച ഇദ്ദേഹം പിന്നീട് ബി.ജെ.പിയില്‍ ചേര്‍ന്ന് മന്ത്രിയാകുകയായിരുന്നു. 

അന്നുമുതല്‍ ഇദ്ദേഹത്തെ അയോഗ്യനാക്കണമെന്നു നിയമസഭാ സ്പീക്കറോട് കോണ്‍ഗ്രസ് ആവശ്യപ്പെട്ടിരുന്നു. എന്നാല്‍, വിഷയത്തില്‍ സ്പീക്കര്‍ ഒരു തീരുമാനവുമെടുത്തില്ല. തുടര്‍ന്നായിരുന്നു പാര്‍ട്ടി സുപ്രിം കോടതിയെ സമീപിച്ചത്.

ഹരജി പരിഗണിക്കവേ, അയോഗ്യനാക്കുന്ന വിഷയത്തില്‍ തീരുമാനം വൈകിപ്പിച്ച മണിപ്പൂര്‍ നിയമസഭാ സ്പീക്കര്‍ വൈ. കേംചന്ദിന്റെ നടപടിയെ രൂക്ഷ ഭാഷയിലാണ് കോടതി വിമര്‍ശിച്ചത്. ജനുവരി 21ന് കേസ് പരിഗണിച്ച സുപ്രിം കോടതി, വിഷയത്തില്‍ നാലാഴ്ചയ്ക്കുള്ളില്‍ തീരുമാനമെടുക്കാന്‍ സ്പീക്കറോട് നിര്‍ദേശിച്ചിരുന്നു. എന്നാല്‍ തീരുമാനമുണ്ടായില്ല. 

കഴിഞ്ഞ ദിവസം സ്പീക്കര്‍ക്കു വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത ഈ മാസം 28വരെ സമയം ആവശ്യപ്പെടുകയായിരുന്നു. എന്നാല്‍, എതിര്‍വിഭാഗം അഭിഭാഷകനായ കപില്‍ സിബല്‍ വിഷയത്തില്‍ കോടതി ഉടന്‍ തീരുമാനമെടുക്കണമെന്ന് ആവശ്യപ്പെട്ടു. 

തുടര്‍ന്നായിരുന്ന തങ്ങളുടെ പ്രത്യേക അധികാരമുപയോഗിച്ച് കോടതിയുടെ ഇടപെടലുണ്ടായത്.

നേരത്തെ, സ്പീക്കര്‍ക്ക് ഇക്കാര്യത്തില്‍ നിര്‍ദേശം നല്‍കാന്‍ ഹൈക്കോടതിക്കു സാധിക്കില്ലെന്നായിരുന്നു മണിപ്പൂര്‍ ഹൈക്കോടതി നിലപാടെടുത്തിരുന്നത്. ഇതിനെതിരേയായിരുന്നു കോണ്‍ഗ്രസ് സുപ്രിം കോടതിയില്‍ അപ്പീല്‍ സമര്‍പ്പിച്ചത്.

മണിപ്പൂരില്‍ 2017ല്‍ നടന്ന നിയമസഭാ തെരഞ്ഞെടുപ്പില്‍ 28 സീറ്റുകള്‍ നേടി കോണ്‍ഗ്രസായിരുന്നു വലിയ ഒറ്റകക്ഷിയായിരുന്നത്. 21 സീറ്റുകള്‍ നേടിയ ബി.ജെ.പി വിമത എം.എല്‍.എമാരുടെയും മറ്റു പാര്‍ട്ടികളുടെയും പിന്തുണയോടെ ഭരണം പിടിക്കുകയായിരുന്നു.