പാരിസ്: യൂറോ കപ്പിലെ നിര്‍ണായക പോരാട്ടത്തില്‍ അയര്‍ലന്‍ഡിനെ എതിരില്ലാത്ത മൂന്നു ഗോളിന് തകര്‍ത്ത് ബെല്‍ജിയം പ്രീ ക്വാര്‍ട്ടര്‍ പ്രതീക്ഷ സജീവമാക്കി. ആദ്യ മത്സരത്തില്‍ ഇറ്റലിയോട് തോറ്റ ബെല്‍ജിയത്തിന്റെ തിരിച്ചുവരവു കൂടിയായിരുന്നു ഈ മത്സരം. റൊമേലു ലുകാകുവിന്റെ ഇരട്ട ഗോളുകളാണ് ബെല്‍ജിയത്തിന് മികച്ച ജയം സമ്മാനിച്ചത്. ടീമിന്റെ മൂന്നാം ഗോള്‍ നേടിയത് ഏക്‌സല്‍ വിറ്റ്‌സലാണ്. 

ആദ്യ മത്സരത്തിലെ നിറം മങ്ങിയ പ്രകടനത്തിന് ഏറെ പഴി കേട്ട ലുകാകു കളിയിലുടനീളം മികവ് പുലര്‍ത്തി. അവസാന മത്സരത്തില്‍ സ്വീഡനോട് ജയിക്കാനായാല്‍ ബെല്‍ജിയത്തിന് പ്രീ ക്വാര്‍ട്ടറിലെത്താം. ഗോള്‍ നേടാനായില്ലെങ്കിലും ബെല്‍ജിയത്തിന്റെ മുന്നേറ്റങ്ങളുടെ ചുക്കാന്‍ പിടിച്ചത് കെവിന്‍ ഡി ബ്രുയനായിരുന്നു. മത്സരത്തിന്റെ തുടക്കം മുതല്‍ അക്രമിച്ചു കളിച്ച ബെല്‍ജിയം ഏതു നിമിഷവും ഗോള്‍ നേടുമെന്ന് കരുതിയിരുന്നു. യാനിക് ഫെരേര കരാസ്‌കോയുടെ മികച്ചൊരു ക്രോസില്‍ ലുകാകുവിന്റെ ഷോട്ട് അയര്‍ലന്‍ഡിന് ഭീഷണിയുയര്‍ത്തിയെങ്കിലും ലക്ഷ്യം കണ്ടില്ല. അടുത്ത ഊഴം ഡി ബ്രുയന്റേതായിരുന്നു. താരത്തിന്റെ മുന്നേറ്റം അയര്‍ലന്‍ഡ് പ്രതിരോധിച്ചു. തോബി ആല്‍ഡര്‍വെയറെല്‍ഡിന്റെ കോര്‍ണറും ലക്ഷ്യത്തിലെത്തിയില്ല. 21ാം മിനുട്ടില്‍ ഡി ബ്രുയന്‍ നല്‍കിയ സുവര്‍ണാവസരം ഏദന്‍ ഹസാദും പുറത്തേക്ക് അടിച്ചു പാഴാക്കി. ആദ്യ പകുതിക്ക് മുന്‍പ് ബെല്‍ജിയം അക്കൗണ്ട് തുറക്കുമെന്ന് കരുതിയെങ്കിലും സാധിച്ചില്ല.
രണ്ടാം പകുതിയുടെ തുടക്കത്തില്‍ തന്നെ ബെല്‍ജിയം അക്കൗണ്ട് തുറന്നു. ഡിബ്രുയന്റെ അപകടകരമായ മുന്നേറ്റത്തില്‍ പന്ത് ലഭിച്ച ലുകാകു തകര്‍പ്പന്‍ ഷോട്ടിലൂടെ ലക്ഷ്യം കാണുകയായിരുന്നു. മുന്നേറ്റങ്ങള്‍ തുടര്‍ന്ന ബെല്‍ജിയം 13 മിനുട്ടുകള്‍ക്ക് ശേഷം ലീഡ് ഉയര്‍ത്തി. മ്യൂണിയറിന്റെ ക്രോസില്‍ മികച്ചൊരു ഹെഡ്ഡറിലൂടെ വിറ്റ്‌സെല്‍ ടീമിന്റെ രണ്ടാം ഗോള്‍ നേടി. രണ്ടു ഗോള്‍ വഴങ്ങിയതോടെ അയര്‍ലന്‍ഡ് തിരിച്ചടിക്കാന്‍ ശ്രമിച്ചെങ്കിലും ബെല്‍ജിയം പ്രതിരോധത്തിന് വെല്ലുവിളി ഉയര്‍ത്താനായില്ല. 70ാം മിനുട്ടില്‍ ഹസാദിന്റെ പാസില്‍ ലുകാകു തന്റെ രണ്ടാം ഗോള്‍ നേടിയതോടെ അയര്‍ലന്‍ഡിന്റെ ചെറുത്തു നില്‍പ്പ് അവസാനിച്ചു.