ന്യൂഡല്‍ഹി: തനിക്കെതിരായ ട്രോളുകള്‍ക്ക് മറുപടിയുമായി ഡല്‍ഹി സര്‍വ്വകലാശാല വിദ്യാര്‍ഥിനി ഗുര്‍മെഹര്‍ കൗര്‍. ക്രിക്കറ്റ് താരം വിരേന്ദര്‍ സെവാഗിന്റെ ട്രോളിന് കുടപിടിച്ച ബോളിവുഡ് താരം രണ്‍ദീപ് ഹൂഡക്കെതിരെയാണ് എ.ബി.വി.പിക്കെതിരെ കാമ്പയിന്‍ നടത്തി ശ്രദ്ധേയയായ ഗുല്‍മോഹറിന്റെ പരിഹാസം. ട്വിറ്ററില്‍ ഹൂഡയുടെ ഖേദപ്രകടനം സംബന്ധിച്ച വാര്‍ത്ത്‌ക്കൊപ്പം 'ഞാനല്ല, എന്റെ കൈകളാണ് ട്വീറ്റ് ചെയ്തിരുന്നത്' എന്ന ട്വീറ്റുമായാണ് ഗുല്‍മോഹര്‍ രംഗത്തെത്തിയിരിക്കുന്നത്. ആദ്യം സെവാഗിനെ അനുകൂലിച്ച രണ്‍ദീപ് പിന്നീട് ഖേദപ്രകടനം നടത്തിയിരുന്നു.
പാകിസ്താനല്ല, യുദ്ധമാണ് തന്റെ അച്ഛനെ ഇല്ലാതാക്കിയതെന്ന് നേരത്തെ ഗുര്‍മെഹര്‍ പറഞ്ഞിരുന്നു. 'ഞാനല്ല, എന്റെ ബാറ്റാണ് ട്രിപ്പില്‍ സെഞ്ച്വറി നേടിയത്' എന്ന ട്വീറ്റ് ചെയ്ത് സേവാഗ് ഗുര്‍മെഹറിന്റെ പരാമര്‍ശത്തെ ട്രോളി. ഈ ട്രോള്‍ ഉപമ കടംകൊണ്ടാണ് ഹൂഡയ്ക്കുള്ള ഗുര്‍മെഹറിന്റെ മറുപടി.
അഭിപ്രായം പറയുന്നതില്‍ താന്‍ കുറേ കൂടി ശ്രദ്ധ പുലര്‍ത്തേണ്ടിയിരുന്നുവെന്നാണ് രണ്‍ദീപ് ഹൂഡയുടെ ഖേദപ്രകടനം. വ്യക്തിപരമായ അഭിപ്രായങ്ങളെ രാഷ്ട്രീയവത്ക്കരിക്കുന്നതിനോട് യോജിക്കുന്നില്ല. ഒരു നടനെന്ന നിലയില്‍ താനും ട്രോളുകള്‍ നേരിട്ടുണ്ട്. ചെറുപ്രായത്തില്‍ സോഷ്യല്‍ മീഡിയ ആക്രമണത്തെ ചെറുക്കുന്നതില്‍ ഗുര്‍മെഹര്‍ കുറച്ചുകൂടി ശ്രദ്ധ പുലര്‍ത്തണമെന്നുമാണ് ഉദ്ദേശിച്ചതെന്നും ഹൂഡ പറഞ്ഞിരുന്നു.