അരൂര്‍: പിക്ക്അപ്പ് വാനിനു പിന്നില്‍ മറ്റൊരു വാനിടിച്ച് രണ്ട് പേര്‍ക്ക് പരുക്ക്. എരമല്ലൂര്‍ കൊച്ചുവെളിക്കവലക്കു സമീപം ഇന്നലെ ഉച്ചക്ക് 2.30 നായിരുന്നു അപകടം.
പരുക്കേറ്റവരെ എരമല്ലൂരിലെ സ്വകാര്യാശുപത്രിയില്‍ പ്രഥമ ശുശ്രൂഷ നല്‍കി വിട്ടയച്ചു. ഇടിയുടെ ആഘാതത്തില്‍ നിയന്ത്രണം തെറ്റിയ വാന്‍ മീഡിയനില്‍ സ്ഥാപിച്ചിരുന്ന സ്ട്രീറ്റ് ലൈറ്റ് ഇടിച്ചു തകര്‍ത്തശേഷം എതിര്‍ ദിശയിലേക്ക് മറിഞ്ഞു. അരൂര്‍ പൊലിസെത്തി ലോറി മാറ്റി ഗതാഗതം പുനസ്ഥാപിച്ചു.
ദേശീയപാതയിലെ അശാസ്ത്രീയ മീഡിയനുകള്‍ എടുത്തുമാറ്റി പകരം ഭൂഗര്‍ഭ ക്രോസിങുകളോ ഓവര്‍ ബ്രിഡ്ജുകളോ സ്ഥാപിക്കണമെന്നാണ് നാട്ടുകാരുടെ ആവശ്യം. റോഡിന്റെ തിരക്കുള്ള പല പ്രധാന കവലകള്‍ക്കു സമീപവും ഇത്തരം യു-ടേണുകള്‍ കാരണം അപകടങ്ങള്‍ ഒരു പതിവു കാഴ്ചയാണ്.