തിരുവനന്തപുരം: സംസ്ഥാനം കൊവിഡ് വ്യാപന ഭീതിയില്‍ മുള്‍മുനയില്‍ നില്‍ക്കുന്നതിനിടെ പൊലിസ് സേനയില്‍ തെക്കുവടക്ക് സ്ഥലംമാറ്റം. സേനയിലെ സ്‌റ്റേഷന്‍ ഹൗസ് ഓഫിസര്‍മാരെ തലങ്ങുംവിലങ്ങും സ്ഥലംമാറ്റി തിങ്കളാഴ്ചയാണ് ഡി.ജി.പി ലോക്‌നാഥ് ബെഹ്‌റ ഉത്തരവിറക്കിയത്. കൊവിഡ് പ്രതിസന്ധിക്കിടെയുള്ള സ്ഥലംമാറ്റ ഉത്തരവ് ഉദ്യോഗസ്ഥര്‍ക്കിടയില്‍ പ്രതിഷേധത്തിന് ഇടയാക്കിയിട്ടുണ്ട്.
സേനയിലെ 106 സ്‌റ്റേഷന്‍ ഹൗസ് ഓഫിസര്‍മാരെയാണ് സ്ഥലംമാറ്റിയത്. തിരുവനന്തപുരത്തുനിന്ന് വായനാട്ടിലേക്കും കണ്ണൂരിലേക്കും ഇടുക്കിയിലേക്കുമൊക്കെയാണ് സ്ഥലംമാറ്റം.
കൊച്ചിയില്‍നിന്ന് മലപ്പുറത്തേക്കും മാറ്റമുണ്ട്. നിലവില്‍ സേവനം ചെയ്യുന്ന സ്ഥലങ്ങളില്‍ കുടുംബത്തോടൊപ്പം കഴിയുന്ന ഉദ്യോഗസ്ഥരാണ് കൂടുതല്‍ പ്രതിസന്ധിയിലായത്.
നിലവിലെ സാഹചര്യത്തില്‍ മാനുഷിക പരിഗണനപോലും നല്‍കാതെയാണ് ഉത്തരവ് ഇറക്കിയിരിക്കുന്നതെന്ന് ഉദ്യോഗസ്ഥര്‍ പറയുന്നു.