കുറ്റ്യാടി: മൊബൈല്‍ ഫോണ്‍ പൊട്ടിത്തെറിച്ച് യുവാവിനു പൊള്ളലേറ്റു. കുറ്റ്യാടി-തൊട്ടില്‍പാലം റോഡിലെ മാര്‍ബിള്‍ കടയിലെ ജീവനക്കാരനും വയനാട് മുത്തങ്ങ സ്വദേശിയുമായ ചന്ദ്രന്‍ മൈക്കര (32)ക്കാണ് പൊള്ളലേറ്റത്.
കഴിഞ്ഞദിവസം രാത്രി പത്തോടെയാണു സംഭവം. പാന്റിന്റെ പോക്കറ്റിലായിരുന്ന ഫോണില്‍നിന്ന് ചൂട് അനുഭവപ്പെട്ടതോടുകൂടി പുക ഉയരുകയും നിമിഷങ്ങള്‍ക്കകം പൊട്ടിത്തെറിക്കുകയുമായിരുന്നു. ഇടതുകാലിന്റെ തുടയ്ക്ക് സാരമായ പൊള്ളലേറ്റിട്ടുണ്ട്. 15000 രൂപയ്ക്ക് ഫോണ്‍ സ്വദേശമായ വയനാട്ടിലെ ബത്തേരിയില്‍നിന്ന് ഒരുമാസം മുന്‍പാണ് വാങ്ങിയത്. കുറ്റ്യാടി പൊലിസില്‍ പരാതി നല്‍കി.