മട്ടാഞ്ചേരി: കൊച്ചി തിരുമല ദേവസ്വം വകയായുള്ള തിരുമല ഗജേന്ദ്രന്‍ ചെരിഞ്ഞു. 44 വയസായിരുന്നു. ഇന്നലെ ഉച്ചയ്ക്ക് മുന്ന് മണിയോടെ പാടശ്ശേരി പറമ്പില്‍ ആന കുടാരത്തിലായിരുന്നു ചെരിഞ്ഞത്. ക്ഷേത്രത്തില്‍ വൈശാഖ പൗര്‍ണ്ണമി ആഘോഷം നടക്കവേയാണ് ഗജേന്ദ്രന്റെ വേര്‍പാട്. കഴിഞ്ഞ ഏതാനും മാസങ്ങളായി പാദരോഗ ചികിത്സയിലായിരുന്നു. കേരളത്തിലെ പ്രമുഖ ക്ഷേത്രങ്ങളില്‍ എഴുന്നള്ളിപ്പില്‍ മുന്‍നിര സ്ഥാനത്തായിരുന്ന ഗജേന്ദ്രന്‍.
2012ല്‍ പനങ്ങാട് വെച്ച് ലോറി പിന്‍ഭാഗത്ത് ഇടിച്ച് ചികിത്സയിലായിരുന്നു. തുടര്‍ന്ന് വീണ്ടും എഴുന്നള്ളിപ്പുകളില്‍ സജീവമായിരുന്ന ഗജേന്ദ്രന്‍. 2017 ഏപ്രില്‍ മാസത്തെ തിരുമല ക്ഷേത്ര മഹോത്സവ എഴുന്നള്ളിപ്പായിരുന്നു അവസാനത്തേത്. പാദങ്ങളിലെ വൃണങ്ങള്‍ പഴുക്കുകയും നിവര്‍ന്നു നില്‍ക്കാന്‍ കഴിയാത്ത സാഹചര്യത്തിലായിരുന്നു ചികിത്സ തുടങ്ങിയത്. മൃഗ സംരക്ഷണ വനംവകുപ്പ് അധികൃതരുമായി ആലോചിച്ച് ആനയുടെ സംസ്‌ക്കാരത്തിനുള്ള തീരുമാനം കൈക്കൊള്ളുമെന്ന് ദേവസ്വം പ്രസിഡന്റ് എസ്.ദേവാനന്ദ കമ്മത്ത് പറഞ്ഞു.