ബാലുശ്ശേരി: ഒന്നേകാല്‍ കിലോ കഞ്ചാവ് ബൈക്കില്‍ കടത്തുകയായിരുന്ന യുവാവിനെ ബാലുശ്ശേരി പൊലിസ് പിടികൂടി. താമരശ്ശേരി വാവാട് സ്വദേശി അനുരാഗ് (25) ആണ് പിടിയിലായത്. പൊലിസിനു ലഭിച്ച രഹസ്യവിവരത്തെ തുടര്‍ന്ന് നടത്തിയ അന്വേഷണത്തിലാണു കോക്കല്ലൂര്‍ പറമ്പിന്‍മുകളില്‍ എസ്.ഐ പി.പി ലളിതയുടെ നേതൃത്വത്തില്‍ തന്ത്രപരമായ നീക്കത്തിലൂടെ പ്രതിയെ വലയിലാക്കിയത്. ബംഗളൂരുവില്‍ നിന്നുമാണ് ഇയാള്‍ കഞ്ചാവെത്തിച്ച് വിവിധ ഭാഗങ്ങളില്‍ ചില്ലറ വില്‍പന നടത്തുന്നതെന്ന് പൊലിസ് പറഞ്ഞു. അടുത്ത കാലത്തായി ബാലുശ്ശേരിയിലും പരിസര പ്രദേശങ്ങളിലും സ്‌കൂളുകള്‍ കേന്ദ്രീകരിച്ച് വന്‍തോതില്‍ കഞ്ചാവ് വില്‍പന നടത്തുന്നതായി വ്യാപക പരാതിയുയര്‍ന്നിരുന്നു. എ.എസ്.ഐ പൃഥ്വിരാജ്, സി.പി.ഒമാരായ റനീഷ്, ഗംഗേഷ്, അഷറഫ്, ജിനു സബാസ്റ്റ്യന്‍, വിനോദ് എന്നിവരാണു പൊലിസ് സംഘത്തിലുണ്ടായിരുന്നത്.