കഴക്കൂട്ടം: എട്ടാം ക്ലാസ് വിദ്യാര്‍ഥിനിയെ ലൈംഗിക പീഡനത്തിനു വിധേയമാക്കിയ അയല്‍വാസിയായ പ്രതിയെ കഴക്കൂട്ടംടം പൊലിസ് അറസ്റ്റ് ചെയ്തു. മേനംകുളം കല്‍പന കോളനിയില്‍ കോണ്‍ഫിഡന്റ് ഫ്‌ളാറ്റിന് എതിര്‍വശം ചിറയരികത്തു പുതുവല്‍ പുത്തന്‍വീട്ടില്‍ ഷിബു എന്ന ഷിബുകുമാര്‍ (38) ആണ് പൊലിസ് പിടിയിലായത്.
കുട്ടിയുടെ വീട്ടുകാരുമായി നല്ല ബന്ധത്തിലും വീട്ടിലെ സന്ദര്‍ശകനുമായ ഷിബുകുമാര്‍ കുട്ടിയുടെ വീട്ടില്‍ ആരും ഇല്ലാത്ത സമയം നോക്കി കുട്ടിയുടെ അച്ഛന്‍ ഇയാളുടെ വീട്ടില്‍ സുഖമില്ലാതെ കിടക്കുകയാണെന്ന് കള്ളം പറഞ്ഞ് അനുനയിപ്പിച്ച് വിളിച്ചുവരുത്തി പീഡിപ്പിക്കുകയായിരുന്നു.
സ്‌കൂള്‍ അധ്യാപകര്‍ കുട്ടിയില്‍നിന്നു വിവരങ്ങള്‍ മനസിലാക്കുകയും ചൈല്‍ഡ് വെല്‍ഫെയര്‍ കമ്മിറ്റിയില്‍ വിവരം അറിയിക്കുകയും ചെയ്തിരുന്നു. ഇതേ തുടര്‍ന്ന് സി.ഡബ്ല്യു.സിയില്‍ ഹാജരാക്കിയ കുട്ടിയുടെ മൊഴി രേഖപ്പെടുത്തിയതിന്റെ അടിസ്ഥാനത്തിലാണ് കഴക്കൂട്ടം പൊലിസ് കേസെടുത്ത് പ്രതിയെ പിടികൂടിയത്. ഷിബുകുമാര്‍ കഴക്കൂട്ടം പൊലിസ് സ്റ്റേഷനില്‍ നിരവധി അടിപിടി കേസുകളില്‍ പ്രതിയാണ്. കൂടാതെ 2017ല്‍ സമാനമായ കേസ് ഇയാള്‍ക്കെതിരേ രജിസ്റ്റര്‍ ചെയ്തിട്ടുമുണ്ട്. ഈ കേസില്‍ ജാമ്യം കിട്ടി പുറത്തിറങ്ങിയതായിരുന്നു ഇയാള്‍. കഴക്കൂട്ടം എ.സി.പി അനില്‍കുമാറിന്റെ നിര്‍ദേശ പ്രകാരം കഴക്കൂട്ടം ഇന്‍സ്‌പെക്ടര്‍ എസ്.എച്ച്.ഒ എസ്.വൈ സുരേഷിന്റെ നേതൃത്വത്തില്‍ സബ് ഇന്‍സ്‌പെക്ടര്‍മാരായ സുധീഷ് കുമാര്‍, റോയ്, ഷാജി ,അജയകുമാര്‍, എ.എസ്.ഐ അന്‍വര്‍, സി.പി.ഒമാരായ പ്രദീപ്, ശ്യാംലാല്‍, പ്രിന്‍സ്, സന്തോഷ് എന്നിവരടങ്ങുന്ന സംഘമാണ് അറസ്റ്റ് ചെയ്തത്.