നെല്ലിക്കുഴി: 'ക്ലീന്‍ നെല്ലിക്കുഴി' പദ്ധതിക്കായി പണിയുന്ന ഓടയിലൂടെ മലിനജലം ഒഴുക്കിവിടുന്നത് തൃക്കാരിയൂര്‍ ഉള്‍പ്പെടുന്ന പ്രദേശത്തെ ജലസ്രോതസ്സുകളെ മലിനപ്പെടുത്തുമെന്ന ആക്ഷേപം ശക്തമാകുന്നു. ഇതര സംസ്ഥാന തൊഴിലാളികള്‍ ഉള്‍പ്പെടെ ജനസാന്ദ്രത ഏറ്റവും കൂടിയ പ്രദേശമാണ് നെല്ലിക്കുഴി. കവലയില്‍ നൂറുകണക്കിന് കച്ചവട സ്ഥാപനങ്ങള്‍ ആണ് പ്രവര്‍ത്തിക്കുന്നത് . ടൗണിലേയും പരിസരത്തേയും ഹോട്ടലുകള്‍, അറവുശാലകള്‍, ഫര്‍ണിച്ചര്‍ യൂണിറ്റുകള്‍ ഉള്‍പ്പെടെ വിവിധ സ്ഥാപനങ്ങളില്‍ നിന്നുള്ള മാലിന്യങ്ങള്‍ സമീപത്തെ കനാലിലേക്കാണ് തള്ളിയിരുന്നത്. നെല്ലിക്കുഴി ടൗണിലും പരിസരത്തുമുള്ള മലിനജലവും , മഴവെള്ളവും ഓടയിലൂടെ നിലവില്‍ പെരിയാര്‍വാലി കനാലിലേക്കാണ് ഒഴുക്കിവിടുന്നത്. പൊതുനിരത്തിലെ മലിനജലം ജലസ്രോതസ്സിലേക്ക് ഒഴുക്കിയതിനെതിരേ പൊതുമരാമത്തിനും പഞ്ചായത്തിനുമെതിരേ നിരവധി പരാതികള്‍ ഉണ്ടായിരുന്നു. ഇതിന്റെ അടിസ്ഥാനത്തിലാണ് ക്ലീന്‍ നെല്ലിക്കുഴി പദ്ധതിക്ക് ആന്റണി ജോണ്‍ എം.എല്‍.എ. ഫണ്ടില്‍ നിന്ന് തുക അനുവദിച്ചത്.
അതിനെത്തുടര്‍ന്നാണ് ഓട നിര്‍മാണം കഴിഞ്ഞ ആഴ്ച്ച ആരംഭിച്ചത് . റോഡിലും മറ്റും പെയ്തിറങ്ങുന്ന മഴവെള്ളം ഒഴുക്കിവിടാനുള്ള ഡ്രെയിനേജ് സംവിധാനം മാത്രമാണ് ഓട എന്നാണ് പഞ്ചായത്ത് അധികൃതര്‍ പൊതുജനങ്ങളെ വിശ്വസിപ്പിച്ചിരിക്കുന്നത് . മലിനജലം പുതിയതായി പണിയുന്ന ഓടയിലൂടെ ഒഴുകിയെത്തുന്ന തൃക്കാരിയൂര്‍ ഉള്‍പ്പെടുന്ന പ്രദേശം മലിനീകരിക്കപ്പെടുമെന്ന ആശങ്കയിലാണ് തൃക്കാരിയൂര്‍ നിവാസികള്‍ . തൃക്കാരിയൂര്‍ മുണ്ടുപാലം ഭാഗത്തെ തോട്ടിലേക്കാണ് മലിനജലം ഒഴുകിയെത്തുന്നത്. ഇത് പ്രദേശത്ത് ഗുരുതരമായ ആരോഗ്യപ്രശ്‌നത്തിന് ഇടയാക്കും. മലിനജലം ഒഴുകിപ്പോകുന്ന ഭാഗത്തെ പാടശേഖരത്തേയും നിരവധി കുടിവെള്ളസ്രോതസ്സുകളേയും മലിനമാക്കുകയും ചെയ്യും. ഇന്നലെ വൈകിട്ട് തൃക്കാരിയൂര്‍ മുണ്ടുപാലത്തു ചേര്‍ന്ന ' സേവ് തൃക്കാരിയൂര്‍ ' പ്രതിഷേധ യോഗത്തില്‍ ഓട നിര്‍മാണം തുടങ്ങുംമുമ്പ് സര്‍വകക്ഷി യോഗം വിളിക്കാമെന്ന് പറഞ്ഞ് അധികൃതര്‍ ഒളിച്ചുകളി നടത്തുകയായിരുന്നുയെന്ന് തൃക്കാരിയൂര്‍ ഭാഗത്തെ വാര്‍ഡ് മെമ്പര്‍മാരായ സന്ധ്യ സുനില്‍കുമാറും, ശോഭാ രാധാകൃഷ്ണനും ആരോപിച്ചു . പ്രദേശത്തെ കൃഷിയേയും,ജനങ്ങളുടെ ആരോഗ്യ സ്ഥിതിയെയും പദ്ധതി പ്രതികൂലമായി ബാധിക്കുമെന്ന് ആക്ഷന്‍ കൗണ്‍സില്‍ സെക്രട്ടറി കെ.എന്‍ ജയചന്ദ്രന്‍ ചൂണ്ടിക്കാണിക്കുന്നു.
നെല്ലിക്കുഴിയുടെ മാലിന്യം തള്ളുവാനുള്ള ഇടമല്ല തൃക്കാരിയൂര്‍ പ്രദേശമെന്നും , നെല്ലിക്കുഴിക്ക് ആവശ്യമായ കുടിവെള്ളം പമ്പ് ചെയ്യുന്ന സ്ഥലം സ്ഥിതിചെയ്യുന്ന ഇവിടം പരിശുദ്ധമായി സൂക്ഷിക്കുവാനുള്ള ഉത്തരവാദിത്തം നെല്ലിക്കുഴി പഞ്ചായത്തിലെ അധികാരികള്‍ക്കുണ്ടെന്നും ചിറലാഡ് റെസിഡന്‍സ് അസോസിയേഷന്‍ സെക്രട്ടറി രാജഗോപാല്‍ യോഗത്തില്‍ ഓര്‍മിപ്പിച്ചു.