റാഞ്ചി: രണ്ടാം ടെസ്റ്റില്‍ തോല്‍വി വഴങ്ങി പരമ്പരയില്‍ പിന്നോക്കം പോയ ആസ്‌ത്രേലിയന്‍ ടീമിനു വീണ്ടും തിരിച്ചടി. അവരുടെ പ്രധാന പേസ് ബൗളര്‍ മിച്ചല്‍ സ്റ്റാര്‍ക്ക് പരുക്കേറ്റ് പുറത്തായതാണു ടീമിനെ കുഴപ്പിക്കുന്നത്. വലതു കാലിനേറ്റ പരുക്കാണു താരത്തിനു വിനയായത്. ഇതോടെ ഇന്ത്യയ്‌ക്കെതിരായ പരമ്പരയിലെ അവശേഷിക്കുന്ന മത്സരങ്ങളിലും സ്റ്റാര്‍ക്കുണ്ടാകില്ലെന്നുറപ്പായി. നേരത്തെ ഓള്‍റൗണ്ടറും മീഡിയം പേസറുമായ മിച്ചല്‍ മാര്‍ഷും തോളിനു പരുക്കേറ്റു മടങ്ങിയിരുന്നു. പിന്നാലെയാണു സ്റ്റാര്‍ക്കിന്റേയും പിന്‍മാറ്റം. മാര്‍ക്കസ് സ്റ്റോയ്‌നിസിനെയാണു മാര്‍ഷിനു പകരം ഓസീസ് ടീമില്‍ ഉള്‍പ്പെടുത്തിയത്. അതേസമയം സ്റ്റാര്‍ക്കിനു പകരം ആരെയാണ് ടീമിലുള്‍പ്പെടുത്തുകയെന്നു അധികൃതര്‍ ഇതുവരെ വ്യക്തമാക്കിയിട്ടില്ല. റാഞ്ചിയില്‍ നടക്കാനിരിക്കുന്ന മൂന്നാം ടെസ്റ്റില്‍ സ്റ്റാര്‍ക്കിനു പകരം ടീമിലെ റിസര്‍വ് ബൗളര്‍ ആയ ജാക്‌സണ്‍ ബേഡ് അവസാന ഇലവനില്‍ ഇടംപിടിച്ചേക്കും.
ബംഗളൂരുവില്‍ നടന്ന രണ്ടാം ടെസ്റ്റിനിടെയാണു സ്റ്റാര്‍ക്കിനു പരുക്കേറ്റത്. കഴിഞ്ഞ ദിവസം നടത്തിയ പരിശോധനയില്‍ സ്റ്റാര്‍ക്കിന്റെ വലതു കാലില്‍ പൊട്ടലുളളതായി കണ്ടെത്തിയതായും പരമ്പരയില്‍ ശേഷിക്കുന്ന മത്സരങ്ങളില്‍ താരത്തിനു കളിക്കാന്‍ സാധിക്കില്ലെന്നും ക്രിക്കറ്റ് ആസ്‌ത്രേലിയ വ്യക്തമാക്കി. രണ്ടു ടെസ്റ്റുകളില്‍ നിന്നു അഞ്ചു വിക്കറ്റാണ് സ്റ്റാര്‍ക്ക് സ്വന്തമാക്കിയത്. ഒരു അര്‍ധ സെഞ്ച്വറി ഉള്‍പ്പെടെ ബാറ്റിങിലും മികവു പുലര്‍ത്തിയ സ്റ്റാര്‍ക്ക് ആദ്യ ടെസ്റ്റില്‍ നിര്‍ണായക ഹാഫ് സെഞ്ച്വറി നേടി ടീമിനെ വിജയിപ്പിക്കുന്നതില്‍ മുഖ്യപങ്കു വഹിച്ചിരുന്നു.
ഈ മാസം 16 മുതലാണു മൂന്നാം ടെസ്റ്റ് ആരംഭിക്കുന്നത്. ജാര്‍ഖണ്ഡ് തലസ്ഥാനമായ റാഞ്ചിയിലെ സ്റ്റേഡിയത്തില്‍ ആദ്യമായി ടെസ്റ്റ് അരങ്ങേറുന്നുവെന്ന പ്രത്യേകതയും മത്സരത്തിനുണ്ട്.