ദുബൈ: അഞ്ച് വര്‍ഷത്തെ ഇടവേളയ്ക്ക് ശേഷം ഇംഗ്ലണ്ട് ക്രിക്കറ്റ് ടീം ഏകദിന ലോക റാങ്കിങില്‍ ഒന്നാം സ്ഥാനത്ത്. ഒന്നാമതുണ്ടായിരുന്ന ഇന്ത്യയെ രണ്ടാം സ്ഥാനത്തേക്ക് പിന്തള്ളിയാണ് ഇംഗ്ലണ്ടിന്റെ നേട്ടം. 2013 ജനുവരിക്ക് ശേഷം ആദ്യമായാണ് ഇംഗ്ലീഷ് ടീം തലപ്പത്തെത്തുന്നത്. 125 റേറ്റിങ് പോയിന്റുകള്‍ നേടിയാണ് ഇംഗ്ലീഷ് ടീം കുതിച്ചത്. രണ്ടാമതുള്ള ഇന്ത്യക്ക് 122 പോയിന്റുകള്‍. ദക്ഷിണാഫ്രിക്കയാണ് 113 പോയിന്റുകളുമായി മൂന്നാമത്. ന്യൂസിലന്‍ഡ് നാലാം സ്ഥാനത്തും ആസ്‌ത്രേലിയ അഞ്ചാം സ്ഥാനത്തും പാകിസ്താന്‍ ആറാം സ്ഥാനത്തും നില്‍ക്കുന്നു.
ബംഗ്ലാദേശ്, ശ്രീലങ്ക, വെസ്റ്റിന്‍ഡീസ്, അഫ്ഗാനിസ്ഥാന്‍, സിംബാബ്‌വെ, അയര്‍ലന്‍ഡ് ടീമുകളാണ് ഏഴ് മുതല്‍ 12 വരെ സ്ഥാനങ്ങളില്‍. ടെസ്റ്റ് റാങ്കിങിലെ ഒന്നാം സ്ഥാനം ഇന്ത്യ നിലനിര്‍ത്തി.