കല്‍പ്പറ്റ: വയനാട് പ്രീമിയര്‍ ലീഗിന്റെ രണ്ടാം സെമിയുടെ ആദ്യപാദത്തില്‍ സാസ്‌ക് സുഗന്ധഗിരിക്ക് ജയം. ടൂര്‍ണമെന്റില്‍ അപരാജിത കുതിപ്പ് നടത്തിയ സ്‌പൈസസ് മുട്ടിലിനെ ഒന്നിനെതിരെ രണ്ട് ഗോളുകള്‍ക്കാണ് സാസ്‌ക് പരാജയപ്പെടുത്തിയത്. സാസ്‌കിനായി വിദേശതാരം കുംസന്‍ രണ്ടുതവണ സ്‌പൈസസിന്റെ വല കുലുക്കിയപ്പോള്‍ മുട്ടിലിന് വേണ്ടി റിച്ചാര്‍ഡ് ഒരു ഗോള്‍ മടക്കി. 10ാം മിനിറ്റില്‍ കുംസന്‍ സാസ്‌കിനെ മുന്നിലെത്തിച്ചു. എന്നാല്‍ 29ാം മിനിറ്റില്‍ ലഭിച്ച പെനാല്‍റ്റി ഗോളാക്കി മാറ്റി സ്‌പൈസസിനെ റിച്ചാര്‍ഡ് കളിയിലേക്ക് തിരിച്ചുകൊണ്ടുവന്നു. 44ാം മിനിറ്റില്‍ സാസ്‌കിന് അനുകൂലമായി ലഭിച്ച പെനാല്‍ട്ടി ഗോളാക്കി മാറ്റിയാണ് കുംസന്‍ വീണ്ടും സാസ്‌കിനെ മുന്നിലെത്തിച്ചത്. ഇന്ന് നടക്കുന്ന രണ്ടാം പാദത്തില്‍ മികച്ച നിലയില്‍ തിരിച്ചെത്തിയാല്‍ ഫൈനലിലേക്ക് പ്രവേശിക്കാമെന്ന പ്രതീക്ഷയിലാണ് സ്‌പൈസസ് ക്യാംപ്. അപരാജിതരെ മുട്ടുകുത്തിച്ചതിന്റെ ആത്മവിശ്വാസത്തില്‍ ഇന്നും വിജയിക്കാമെന്ന പ്രതീക്ഷയിലാണ് സാസ്‌ക്.