കൊല്ലം: ചവറ ഗവ.കോളജില്‍ വിദ്യാര്‍ഥി സംഘര്‍ഷം. കല്ലേറില്‍ വിദ്യാര്‍ഥികള്‍ക്കും വഴിയാത്രക്കാര്‍ക്കും പൊലിസുകാരനും പരിക്ക്. ഇന്നു രാവിലെ അധ്യയനം തുടങ്ങാന്‍ നേരത്തായിരുന്നു സംഘര്‍ഷം തുടങ്ങിയത്. കെ.എസ്.യുഎസ്.എഫ്.ഐ വിദ്യാര്‍ഥികളാണ് ഏറ്റുമുട്ടിയത്.

കല്ലേറില്‍ നിരവിധി വിദ്യാര്‍ഥികള്‍ക്കും ദേശീയപാതയിലൂടെപോയ യാത്രക്കാര്‍ക്കും സ്‌പെഷ്യല്‍ബ്രാഞ്ചിലെ സിവില്‍ പൊലിസ് ഓഫീസര്‍ ഗോപകുമാറിനും പരിക്കേറ്റു. പൊലിസെത്തിയെങ്കിലും അക്രമണം തുടരുകയായിരുന്നു. തൊട്ടടുത്തായാണ് ചവറ പൊലിസ് സ്‌റ്റേഷന്‍ സ്ഥിതിചെയ്യുന്നത്. അക്രമ സമയത്തു പൊലിസുകാര്‍ കുറവായിരുന്നു. ഇന്നലെ കെ.എസ്.യു സംസ്ഥാന വ്യാപകമായി നടത്തിയ വിദ്യാഭ്യാസ ബന്ദില്‍ കോളെജില്‍ ഉണ്ടായ സംഘട്ടനത്തിന്റെ തുടര്‍ച്ചയായിരുന്നു ഇന്നത്തെ സംഭവം. കോളജിനു അകത്തുനിന്നുള്ള കല്ലേറിലാണ് പൊലിസുകാരനും യാത്രക്കാര്‍ക്കും പരിക്കേറ്റത്. കോളെജിനകത്തും കല്ലേറു നടന്നു. ഇന്നു ചവറയില്‍ കെ.എസ്.യു പഠിപ്പുമുടക്കുകയാണ്.