അമരാവതി: ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡുവിന്റെ അറസ്റ്റിലേക്ക് നയിച്ച കേസ് അന്വേഷിച്ച ഐ.പി.എസ് ഓഫീസറെ സസ്‌പെന്‍ഡ് ചെയ്തു. ആന്ധ്ര മുന്‍ സി.ഐ.ഡി എഡിജിപി എന്‍ സഞ്ജയ്‌ക്കെതിരെയാണ് ആന്ധ്രാ സര്‍ക്കാരിന്റെ നടപടി. വിജിലന്‍സ് അന്വേഷിച്ച സാമ്പത്തിക ക്രമക്കേട് കേസില്‍ സഞ്ജയ് കുറ്റക്കാരനാണെന്ന് കണ്ടെത്തിയിരുന്നു. 

ആന്ധ്ര ദുരന്തനിവാരണഅഗ്‌നിരക്ഷാ സേന ഡയരക്ടര്‍ ജനറല്‍ ആയിരുന്ന കാലത്തെ സാമ്പത്തിക ക്രമക്കേടിലാണു നടപടി. ഒരു കോടി രൂപ വകമാറ്റി ചെലവഴിച്ചെന്നാണ് കേസ്. ഒരു വെബ്‌പോര്‍ട്ടല്‍ ആരംഭിക്കാനും ഹാര്‍ഡ്‌വെയര്‍ വിതരണത്തിനുമായി വിളിച്ച ടെന്‍ഡറിലാണ് തിരിമറി നടന്നതെന്നാണ് കണ്ടെത്തിയിരിക്കുന്നത്.

1996 ബാച്ച് ഐപിഎസ് ഓഫീസറായ സഞ്ജയ് സിഐഡി മേധാവിയായിരിക്കെ ഉന്നത രാഷ്ട്രീയ വൃത്തങ്ങള്‍ ഉള്‍പ്പെട്ട ഏതാനും കേസുകളില്‍ അന്വേഷണം നടത്തിയിരുന്നു. ഇകൂട്ടത്തിലാണ് ചന്ദ്രബാബു നായിഡു ഉള്‍പ്പെട്ട ആന്ധ്ര സ്‌കില്‍ ഡെവലപ്‌മെന്റ് കോര്‍പറേഷന്‍ അഴിമതിയും അദ്ദേഹം അന്വേഷിച്ചത്. അന്വേഷണത്തിനു പിന്നാലെയാണ് 2023 സെപ്റ്റംബറില്‍ അന്വേഷണസംഘം ടിഡിപി നേതാവിനെ അറസ്റ്റ് ചെയ്യുന്നത്.

IPS officer who investigated the case that led to Chandrababu Naidus arrest has been suspended