കോഴിക്കോട്: അന്താരാഷ്ട്ര നിലവാരമുള്ള കോച്ചിങ് സൗകര്യങ്ങള്‍ ഒരുക്കുന്നതിന്റെ ഭാഗമായി മലബാര്‍ ബാഡ്മിന്റണ്‍ അക്കാദമിയില്‍ അന്താരാഷ്ട്ര ബാഡ്മിന്റണ്‍ കോച്ചിന്റെ സേവനമൊരുക്കുന്നു. ഇന്ത്യോനേഷ്യന്‍ രാജ്യാന്തര താരവും കോച്ചുമായ യൂസാന്‍ഡിയാണ് മലബാര്‍ അക്കാദമിയുടെ ചീഫ് കോച്ചായി ചുമതലയേറ്റത്. അന്താരാഷ്ട്ര നിലവാരമുള്ള നാലു വുഡണ്‍ ഇന്‍ഡോര്‍ കോര്‍ട്ടുകള്‍, മിനി ജിം എന്നിവ അക്കാദമിയില്‍ ഒരുക്കിയിട്ടുണ്ട്. ബാഡ്മിന്റണ്‍ അക്കാദമിയുടെ കീഴില്‍ ആരംഭിച്ച കോര്‍ട്ടിന് മണ്ണില്‍ വിജയന്‍ ബാഡ്മിന്റണ്‍ ഹൗസ് എന്നാണ് നാമകരണം ചെയ്തിരിക്കുന്നത്. മാക്‌സ് കെയര്‍ വിജയന്‍ നിര്‍മിച്ചു നല്‍കിയ രണ്ട് വുഡണ്‍ കോര്‍ട്ടുകളുമുണ്ട്. കഴിഞ്ഞ ഒന്നര വര്‍ഷത്തിനിടയില്‍ 60 ഓളം കുട്ടികള്‍ക്ക് പരിശീലനം നല്‍കിവരുന്നു.
ഒളിംപിക്‌സ് ലക്ഷ്യമിട്ടുകൊണ്ട് താരങ്ങളെ വാര്‍ത്തെടുക്കാനുള്ള പദ്ധതികളുമായി മുന്നോട്ടുപോകുമെന്ന് അക്കാദമി ഭാരവാഹികള്‍ അറിയിച്ചു.
വാര്‍ത്താസമ്മേളനത്തില്‍ കോച്ച് യൂസാന്‍ഡി, അക്കാദമി ഭാരവാഹികളായ അലോക് സാബു, എസ് മുരളീധരന്‍, വേണുഗോപാല്‍, രാജരാജേശ്വരി സംബന്ധിച്ചു.