എം.എല്‍.എ മൂന്ന് കോടി അനുവദിച്ചു

കോഴിക്കോട്: മീഞ്ചന്ത ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂള്‍ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ പ്രാരംഭ പ്രവര്‍ത്തനങ്ങള്‍ക്ക് തുടക്കം കുറിച്ചു. എം.കെ മുനീര്‍ എം.എല്‍.എയുടെ നേതൃത്വത്തില്‍ ഫൈസല്‍ ആന്റ് ഷബാന ഫൗണ്ടേഷനാണ് മീഞ്ചന്ത ഹൈസ്‌കൂളിനെ ഏറ്റെടുത്തിരിക്കുന്നത്. പദ്ധതിയുടെ പ്രാരംഭ പ്രവര്‍ത്തനങ്ങള്‍ക്കായി എം.എല്‍.എയുടെ ആസ്തി വികസന ഫണ്ടില്‍ നിന്നും മൂന്ന് കോടി രൂപ അടിയന്തിരമായി അനുവദിച്ചതായി സ്‌കൂളില്‍ നടന്ന സ്വീകരണ പരിപാടിയിലും തുടര്‍ന്ന് അനുമോദന ചടങ്ങിലും ഡോ എം.കെ മുനീര്‍ അറിയിച്ചു.
ഈ വര്‍ഷത്തെ വിജയോത്സവ പരിപാടികള്‍ കോഴിക്കോട് നഗരസഭ വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ എം. രാധാകൃഷ്ണന്‍ മാസ്റ്റര്‍ ഉദ്ഘാടനം ചെയ്തു. എസ്.എസ്.എല്‍.സിക്ക് മുഴുവന്‍ എ പ്ലസ് നേടിയ വിദ്യാര്‍ഥികള്‍ക്ക് എം.എല്‍.എയും, എം രാധാകൃഷ്ണന്‍ മാസ്റ്ററും അവാര്‍ഡുകള്‍ വിതരണം ചെയ്തു. വിവിധ ക്ലബ്ബുകളുടെ ഉദ്ഘാടനം പ്രസ് ക്ലബ് പ്രസിഡന്റ് കമാല്‍ വരദൂര്‍ നിര്‍വഹിച്ചു. രാഷ്ട്രപതി ഗൈഡ് അവാര്‍ഡ് വിതരണം കൗണ്‍സിലര്‍ നമ്പിടി നാരായണനും, മെഡിക്കല്‍ എന്‍ട്രന്‍സ് പരീക്ഷയിലെ മികച്ച റാങ്ക് നേടിയ മുഹമ്മദ് ഫത്താഹിനുള്ള ഉപഹാരം കൗണ്‍സിലര്‍ നജ്മയും നല്‍കി. മേലടി നാരായണന്‍, പ്രിന്‍സിപ്പല്‍ കെ.സി പ്രദീപ, എന്‍.എ റസാക്ക് സംസാരിച്ചു. എ.കെ ഉദീഷ് കുമാര്‍ അധ്യക്ഷനായി. ഹെഡ്മിസ്ട്രസ് വി.ജി ജീത സ്വാഗതവും എം.പി മോഹനന്‍ നന്ദിയും പറഞ്ഞു.