ഡല്‍ഹി: കേരളം ഉള്‍പ്പെടെ അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് തിയ്യതികള്‍ കേന്ദ്ര തെരഞ്ഞെടുപ്പ് കമ്മിഷന്‍ ഇന്ന് പ്രഖ്യാപിക്കും. ഇന്ന് ഉച്ചയ്ക്ക് ശേഷം നാലുമണിക്ക് നടക്കുന്ന വാര്‍ത്താസമ്മേളനത്തില്‍ പ്രഖ്യാപനം ഉണ്ടാവും. കേരളത്തിന് പുറമെ തമിഴ്‌നാട്, പുതുച്ചേരി, പശ്ചിമബംഗാള്‍, അസം എന്നിവിടങ്ങളിലാണ് തെരഞ്ഞെടുപ്പ് നടക്കാന്‍ പോകുന്നത്. 

ഏപ്രില്‍ 17 നും 24 നും ഇടയിലായിരിക്കും കേരളത്തില്‍ വോട്ടെടുപ്പെന്നാണ് വിവരം. വിഷു, ഈസ്റ്റര്‍ ആഘോഷങ്ങള്‍ പരിഗണിച്ചാവും തിയ്യതി നിര്‍ണയിക്കുക. മേയ് ആദ്യവാരമാകും ഫലപ്രഖ്യാപനം. തെരഞ്ഞെടുപ്പ് തീയതി പ്രഖ്യാപിച്ചാല്‍ ഇന്ന് മുതല്‍ തെരഞ്ഞെടുപ്പ് പെരുമാറ്റച്ചട്ടം നിലവില്‍ വരും. 

വിവിധ സംസ്ഥാനങ്ങളിലെ വോട്ടര്‍പട്ടിക പുതുക്കലും ബൂത്തുകളുടെ പരിശോധനയും കമ്മീഷന്‍ പൂര്‍ത്തിയാക്കി കഴിഞ്ഞു.തെരഞ്ഞെടുപ്പ് സുഗമമായി നടത്താന്‍ അര്‍ദ്ധ സൈനിക വിഭാഗങ്ങളെ വിന്യസിക്കുന്നതുമായി ബന്ധപ്പെട്ട് കേന്ദ്ര ആഭ്യന്തര മന്ത്രാലയവുമായി കമ്മീഷന്‍ ചര്‍ച്ച നടത്തി.മെയ് അഞ്ചിന് മുന്‍പായി വോട്ടെണ്ണല്‍ പൂര്‍ത്തിയാക്കി പുതിയ സര്‍ക്കാരുകള്‍ അധികാരമേല്‍ക്കുന്ന തരത്തിലാകും കമ്മീഷന്റെ ഷെഡ്യൂള്‍.

അതേസമയം, കേരളത്തില്‍ വിവിധ പാര്‍ട്ടികളുടെ സ്ഥാനാര്‍ഥി പട്ടികകള്‍ അന്തിമഘട്ടത്തിലാണ്. തെരഞ്ഞെടുപ്പ് തിയ്യതി പുറത്തുവന്നാലുടന്‍ സ്ഥാനാര്‍ഥികളെ പ്രഖ്യാപിച്ച് പ്രചാരണ പരിപാടികളിലേക്ക് കടക്കാനാണ് പാര്‍ട്ടികളുടെ തീരുമാനം.