മാഡ്രിഡ്: ബാഴ്‌സലോണ- പി.എസ്.ജി ചാംപ്യന്‍സ് ലീഗ് പ്രീ ക്വാര്‍ട്ടര്‍ രണ്ടാം പാദ മത്സരം നിയന്ത്രിച്ച റഫറിക്കെതിരേ യുവേഫയുടെ അന്വേഷണം. ജര്‍മ്മന്‍ റഫറി ഡെനിസ് അയ്‌ടെക്കിനെതിരെയാണു യുവേഫ അന്വേഷണം പ്രഖ്യാപിച്ചിരിക്കുന്നത്. മുന്‍ ഇതിഹാസ ഇറ്റാലിയന്‍ റഫറിയും യുവേഫ റഫറിയിങ് പാനല്‍ തലവനുമായ പിയര്‍ലൂജി കൊളീന അധ്യക്ഷനായ സമിതിയ്ക്കാണു അന്വേഷണ ചുമതല.
മത്സരത്തില്‍ ബാഴ്‌സക്കായി ജര്‍മന്‍ റഫറി നിയമ വിരുദ്ധമായാണു പെനാല്‍റ്റി അനുവദിച്ചതെന്നാണു പ്രധാനം ആരോപണം. പി.എസ്.ജിയുടെ അവസരങ്ങള്‍ തടയുന്നവിധം സ്ഥിരമായി ഓഫ് സൈഡ് വിളിച്ചെന്നും ബാഴ്‌സയ്ക്ക് അനുകൂലമായിരുന്നു റഫറിയുടെ കളിക്കളത്തിലെ പെരുമാറ്റമെന്നും ആക്ഷേപമുണ്ടായിരുന്നു. ആരോപണങ്ങള്‍ ശരിയാണെന്നു തെളിഞ്ഞാല്‍ ജര്‍മന്‍ റഫറിക്കെതിരേ കടുത്ത അച്ചടക്ക നടപടികള്‍ സ്വീകരിക്കും.