ഗൊരോംഗോസ: തെക്കന്‍ ആഫ്രിക്കന്‍ രാജ്യമായ മൊസാംബിക്കിന്റെ ദീര്‍ഘകാലത്തെ പ്രതിപക്ഷ നേതാവായ അഫോന്‍സോ ദ്‌ലകാമാ അന്തരിച്ചു. 65 വയസായിരുന്നു. രോഗബാധിതനായി കിടപ്പിലായിരുന്നു. മധ്യ മൊസാംബിക്ക് നഗരമായ ഗൊരോംഗോസയില്‍ വച്ചാണ് അന്ത്യം.
രാജ്യത്തെ പ്രമുഖ വിമത സംഘമായിരുന്ന മൊസാംബിക് നാഷനല്‍ റെസിസ്റ്റന്‍സ്(റെനാമോ) നേതാവായിരുന്നു അഫോന്‍സോ. പ്രസിഡന്റ് ഫിലിപ്പ് ന്യൂസിയുടെ നേതൃത്വത്തിലുള്ള ഭരണകക്ഷിയായ ലിബറേഷന്‍ ഓഫ് മൊസാംബികു(ഫ്രെലിമോ)മായി റെനാമോ ദീര്‍ഘകാലമായി ആഭ്യന്തര സംഘര്‍ഷത്തിലായിരുന്നു. ആഭ്യന്തര യുദ്ധത്തില്‍ പത്തു ലക്ഷത്തോളം പേര്‍ കൊല്ലപ്പെട്ടതായാണു വിവരം. 1992ല്‍ സമാധാന കരാറിലൂടെയാണു യുദ്ധം അവസാനിച്ചത്. പിന്നീട് റെനാമോയെ പ്രതിപക്ഷ പാര്‍ട്ടിയായി ഔദ്യോഗികമായി അംഗീകരിക്കുകയായിരുന്നു. അഫോന്‍സോയുടെ മരണത്തില്‍ ഫിലിപ്പ് അനുശോചനം രേഖപ്പെടുത്തി.