കാഞ്ഞങ്ങാട്: കാഞ്ഞങ്ങാട് - കാണിയൂര്‍ റെയില്‍പാത യാഥാര്‍ഥ്യമാക്കാനുള്ള പ്രവര്‍ത്തനങ്ങള്‍ ഊര്‍ജിതമാക്കാന്‍ കാഞ്ഞങ്ങാട് നഗരവികസന കര്‍മ സമിതിയോഗത്തില്‍ തീരുമാനം. ഈ പാതയുടെ സര്‍വേ നടപടികള്‍ പൂര്‍ത്തിയാക്കി പദ്ധതി ലാഭകരമാണെന്ന് കണ്ടെത്തിയിട്ടും തുടര്‍നടപടികള്‍ സ്വീകരിക്കുന്നതില്‍ കേന്ദ്ര-സംസ്ഥാന സര്‍ക്കാരുകള്‍ വൈമുഖ്യം കാണിക്കുന്നതില്‍ യോഗം പ്രതിഷേധിച്ചു.
പാത നടപ്പാക്കുന്നതില്‍ സംസ്ഥാന സര്‍ക്കാരിന്റെ പങ്കാളിത്തം സംബന്ധിച്ച് മുഖ്യമന്ത്രി നേരത്തെ നല്‍കിയ ഉറപ്പുകള്‍ പാലിക്കണമെന്ന് ആവശ്യപ്പെട്ട് കര്‍മ സമിതിയുടെ നേതൃത്വത്തില്‍ സര്‍വകക്ഷി സംഘം ഉടന്‍ തന്നെ മുഖ്യമന്ത്രിയെ കാണാനും യോഗത്തില്‍ തീരുമാനമായി. തുടര്‍ നടപടികള്‍ ഇല്ലെങ്കില്‍ ബഹുജന പ്രക്ഷോഭത്തിലേക്ക് നീങ്ങാനും ഇതിന്റെ മുന്നോടിയായി അടുത്തമാസം കാഞ്ഞങ്ങാട്ട് ജനകീയ കൂട്ടായ്മ സംഘടിപ്പിക്കാനും തീരുമാനിച്ചു.
സമിതി ചെയര്‍മാന്‍ അഡ്വ. പി. അപ്പുക്കുട്ടന്‍ അധ്യക്ഷനായി. ജനറല്‍ കണ്‍വീനര്‍ സി. യൂസഫ്ഹാജി, കണ്‍വീനര്‍ സി.എ പീറ്റര്‍, കുഞ്ഞിക്കണ്ണന്‍ കക്കാണത്ത്, എ. ഹമീദ്ഹാജി, ടി. മുഹമ്മദ് അസ്‌ലം, എം. വിനോദ്, സി. മുഹമ്മദ് കുഞ്ഞി, എ. ദാമോദരന്‍, എം.എസ് പ്രദീപ്, കെ.വി സുരേഷ്ബാബു സംസാരിച്ചു.