സോള്‍: അമേരിക്കയെ ലക്ഷ്യംവച്ച് പസഫിക്കില്‍നിന്ന് തൊടുത്തുവിടാവുന്ന മിസൈല്‍ തങ്ങളുടെ കൈവശമുണ്ടെന്ന് ഉത്തര കൊറിയന്‍ ഏകാധിപതി കിം ജോംഗ് ഉന്‍. ശക്തിയേറിയ രണ്ട് മുസൂദന്‍ മധ്യദൂര മിസൈലുകള്‍ ഇന്നലെ ഉത്തരകൊറിയ പരീക്ഷിച്ചതായുള്ള വാര്‍ത്തകള്‍ സ്ഥിരീകരിച്ചാണ് കിം ജോംഗ് ഉന്നിന്റെ അവകാശവാദം.

മിസൈല്‍ പരീക്ഷണം വിജയകരമെന്നും അദ്ദേഹം പറഞ്ഞു. പസഫികിലെ യുഎസിന്റെ സൈനികത്താവളങ്ങള്‍ വരെ എത്താന്‍ ശേഷിയുള്ള മിസൈലാണ് പരീക്ഷിച്ചതെന്ന് കിം ജോംഗ് ഉന്‍ പറഞ്ഞതായി ഉത്തരകൊറിയന്‍ ദേശിയ മാധ്യമങ്ങള്‍ റിപ്പോര്‍ട്ടു ചെയ്തു.

2500 മുതല്‍ 4000 കിലോമീറ്റര്‍ വരെ ദൂരത്തില്‍ എത്തുന്ന മിസൈലാണ് കഴിഞ്ഞ ദിവസം പരീക്ഷിച്ചതെന്നാണ് റിപ്പോര്‍ട്ടുകള്‍. കാലത്ത് 5.58നും 8.05നുമാണ് രണ്ടു മിസൈലുകളും വിക്ഷേപിച്ചത്. ഉത്തരകൊറിയയില്‍ നടത്താനുദ്ദേശിക്കുന്ന ആണവ പദ്ധതികളുടെ സൂചനയായാണ് മിസൈല്‍ പരീക്ഷണങ്ങളെ ലോകം കാണുന്നത്. എന്നാല്‍ ഈ വാദങ്ങളെ കിം തള്ളിക്കളഞ്ഞു.