വടക്കാഞ്ചേരി: പുല്ലാനിക്കാട് എങ്കക്കാട് റോഡിലെ കല്ലംകുണ്ടില്‍ വീടിനുള്ളില്‍ കയറി പതുങ്ങിയിരുന്ന് വീട്ടമ്മയെ ആക്രമിക്കാന്‍ ശ്രമിച്ച യുവാവിനെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു.
കല്ലംകുണ്ട് ചേമ്പത്തേരി റഫീഖിന്റെ വീട്ടില്‍ നിന്നാണ് യുവാവിനെ പിടികൂടിയത്. വീട്ടുകാരെല്ലാവരും വീടിന്റെ  മുന്‍വശത്ത് ഇരിക്കുന്നതിനിടെ റഫീഖിന്റെ ഭാര്യ അഫ്‌സിയ  അടുക്കളയിലെത്തി ലൈറ്റിട്ടതും പതുങ്ങിയിരുന്ന യുവാവ് ചാടി എഴുന്നേറ്റ് കഴുത്തില്‍ പിടിക്കുകയായിരുന്നു.
ഇവര്‍ ബഹളമുണ്ടാക്കിയപ്പോള്‍ അടുക്കള വാതിലിലൂടെ പുറത്തേക്കോടി. തുടര്‍ന്ന് നാട്ടുകാര്‍ ഓടിക്കൂടിയപ്പോള്‍ യുവാവ് വീടിനു പുറത്തിരുന്ന ഇരുമ്പ് വടി എടുത്ത് വീശിയെങ്കിലും നാട്ടുകാര്‍ കീഴ്‌പ്പെടുത്തി വടക്കാഞ്ചേരി പൊലീസിന് കൈമാറി.
ഇയാള്‍ അന്യസംസ്ഥാന തൊഴിലാളിയാണോയെന്ന് സംശയിക്കുന്നു. ഇടക്കിടെ ഭാഷ മാറ്റി പറയുകയാണ്. നിരവധി മോഷണങ്ങള്‍ നടന്നിട്ടുള്ള പ്രദേശമാണ് കല്ലംകുണ്ട്.