മലപ്പുറം: പുതുക്കിയ റേഷന്‍കാര്‍ഡിനുള്ള അന്തിമ പട്ടിക അംഗീകരിച്ചതു ജില്ലയിലെ 33 തദ്ദേശ സ്ഥാപനങ്ങള്‍. ഈ മാസം എട്ടിനു മുന്‍പ് എല്ലാ തദ്ദേശ സ്ഥാപനങ്ങും അന്തിമ പട്ടിക അംഗീകരിക്കണമെന്നാണ് നിര്‍ദേശമുണ്ടായിരുന്നത്. എന്നാല്‍, ഭൂരിഭാഗം തദ്ദേശസ്ഥാപനങ്ങളും പട്ടികയ്ക്ക് അംഗീകാരം നല്‍കിയിട്ടിലല്.
33 തദ്ദേശസ്ഥാപനങ്ങളില്‍നിന്നായി 1,614 അനര്‍ഹരെയാണ് കണ്ടെത്തിയത്. സിവില്‍ സപ്ലൈസ് ഉദ്യോഗസ്ഥര്‍ പരിശോധന നടത്തിയതിനുശേഷം അനര്‍ഹരാണെന്നു തെളിഞ്ഞാല്‍ ഇവരെ പട്ടികയില്‍നിന്ന് ഒഴിവാക്കും.  കഴിഞ്ഞ വര്‍ഷം ഒക്ടോബറില്‍ പ്രസിദ്ധീകരിച്ച മുന്‍ഗണനാ, മുന്‍ഗണനേതര പട്ടികയില്‍ പരാതികളും ആക്ഷേപങ്ങളും സ്വീകരിച്ചു വെരിഫിക്കേഷന്‍ നടപടിക്രമങ്ങള്‍ ഇതിനകം പൂര്‍ത്തിയായിട്ടുണ്ട്. ഇതിനു ശേഷമാണ് അന്തിമ പട്ടികയില്‍ അനര്‍ഹരായവര്‍ വീണ്ടും ഉള്‍പ്പെട്ടിട്ടുണ്ടെങ്കില്‍ അവരെ ഒഴിവാക്കുന്നതിനു ശുപാര്‍ശ ചെയ്യുന്നതിന് എല്ലാ തദ്ദേശ സ്വയംഭരണ സ്ഥാപനങ്ങളിലും ഭരണസമിതിയോഗം ചേരുന്നതിനും ഗുണഭോക്തൃപട്ടികയ്ക്ക് അംഗീകാരം നല്‍കുന്നതിനും നടപടികള്‍ സ്വീകരിക്കാന്‍ നിര്‍ദേശം നല്‍കിയത്. എന്നാല്‍, അനര്‍ഹരെ ഒഴിവാക്കുന്നതിലേറെ അര്‍ഹരെ ഉള്‍പ്പെടുത്താനുള്ള ആവശ്യങ്ങളാണ് വാര്‍ഡ് സഭകളിലും തദ്ദേശ സ്ഥാപനങ്ങളിലും ലഭിച്ചുകൊണ്ടിരിക്കുന്നത്. പഞ്ചായത്തുകളിലും നഗരസഭകളിലും ലഭിച്ച മുന്‍ഗണന പട്ടികയുടെ അടിസ്ഥാനത്തില്‍ അനര്‍ഹരുടെ നീണ്ട നിരയുണ്ട്. പഞ്ചായത്തുകളും നഗരസഭകളും അനര്‍ഹരെ ഒഴിവാക്കി പട്ടിക അന്തിമമാക്കി അതാതു സമിതികള്‍ അംഗീകരിച്ചു പ്രമേയം പാസാക്കണമെന്നാണ് നിര്‍ദേശം. ജനുവരി 31ന് മുന്‍പു പട്ടിക അംഗീകരിക്കണമെന്നായിരുന്നു ആദ്യ നിര്‍ദേശം. തുടര്‍ന്നു ഫെബ്രുവരി 20 വരെയും പിന്നീട് 23 വരെയും പിന്നീട് മാര്‍ച്ച് മൂന്നു വരെയും നീട്ടി. എന്നിട്ടും പട്ടികയ്ക്ക് അംഗീകാരമാകാത്തതിനെ തുടര്‍ന്ന് ഈ മാസം എട്ടു വരെ സമയപരിധി വീണ്ടും നീട്ടിയിരുന്നു. എന്നിട്ടും മുഴുവന്‍ പഞ്ചായത്തുകള്‍ക്കും പട്ടിക അംഗീകരിക്കാനായിട്ടില്ല. ഇനിയും അംഗീകരിക്കാത്ത തദ്ദേശസ്ഥാപനങ്ങളുടെ പട്ടിക അംഗീകരിച്ചതായി കണക്കാക്കാനാണ് സര്‍ക്കാര്‍ തീരുമാനം.