പടിഞ്ഞാറത്തറ: ആദിവാസികളുള്‍പ്പടെ നൂറുകണക്കിന് ആളുകള്‍ നിത്യേന സഞ്ചരിക്കുന്ന മാടത്തുംപാറ കപ്യാര്‍കുന്ന് കടവില്‍ നടക്കാനെങ്കിലും ഒരു പാലം വേണമെന്ന ആവശ്യം ശക്തമാകുന്നു.
നിലവില്‍ കിലോമീറ്ററുകള്‍ താണ്ടിവേണം ഇവിടുത്തുകാര്‍ക്ക് പടിഞ്ഞാറത്തറ ടൗണിലേക്കെത്താന്‍. പടിഞ്ഞാറത്തറ കപ്യാര്‍കുന്ന് ചെറുപുഴയിലാണ് പാലം നിര്‍മിക്കുന്നതിനായി പ്രദേശവാസികള്‍ അധികൃതരെ അറിയിച്ചിരുന്നത്.
വിവിധ ആദിവാസി ഗോത്രസമുദായങ്ങള്‍ ഉള്‍പ്പെടെ നിരവധി ജനങ്ങള്‍ താമസിക്കുന്ന ഈ പ്രദേശത്ത് മഴക്കാലമാവുന്നതോടെ കിലോമീറ്ററുകള്‍ താണ്ടിവേണം ഇവിടുത്തുകാര്‍ക്ക് ടൗണിലേക്കെത്താന്‍. ആദിവാസി മേഖലകൂടിയായ ഇവിടെ കുറിച്ച്യ പണിയ വിഭാഗക്കാരായ വിദ്യാര്‍ഥികള്‍ക്ക് പടിഞ്ഞാറത്തറ സ്‌കൂളിലേക്ക് പോകുന്നതിനും ജില്ലയിലെ വിവിധ ഉന്നത വിദ്യാഭ്യാസ സ്ഥാപനങ്ങളില്‍ എത്തിപ്പെടുന്നതിലും വളരെ പ്രയാസമാണ് നേരിടുന്നത്. വിദ്യാര്‍ഥികളടക്കമുള്ളവര്‍ പുഴയിലൂടെ ഇറങ്ങിയാണ് അക്കരെ കടക്കുന്നത്. ഇത് വലിയ അപകടങ്ങള്‍ക്ക് കാരണമാവുന്നുമുണ്ട്. കൂടാതെ മലമ്പാമ്പുകളുടെ ശല്ല്യമുള്ളതിനാല്‍ പുഴയില്‍ ഇറങ്ങുന്നത് ഏറെ ഭീതികരവുമാണന്ന് നാട്ടുകാര്‍ പറയുന്നു. പാലം യാഥാര്‍ഥ്യമാവുന്നതോടെ രോഗികളെ ആശുപത്രിയിലേക്കെത്തിക്കുന്നതിനും മറ്റും മീറ്ററുകള്‍ മാത്രം സഞ്ചരിച്ചാല്‍ റോഡിലേക്കുന്നതിനും സഹായകമാണ്. എന്നാല്‍ താല്‍ക്കാലികാശ്വാസമെന്നോണം പ്രദേശ വാസികള്‍ റിങ്ങുകളും അതില്‍ മീതെ രണ്ട് പോസ്റ്റും ഇട്ട് നടന്ന് അക്കരെയെത്തുന്നതിനായി സൗകര്യമൊരുക്കിയിരുന്നു. എന്നാല്‍ രണ്ട് ദിവസം മുമ്പ് സാമൂഹ്യ വിരുദ്ധര്‍ രണ്ട് റിങ്ങ് ഇവിടെ നിന്ന് മാറ്റുകയും കാല്‍നടയാത്രപോലും ദുഷ്‌കരമാക്കുകയും ചെയ്തു.
മാറിമാറി വരുന്ന സര്‍ക്കാരുകള്‍ തെരഞ്ഞെടുപ്പ് നടക്കുന്ന സമയത്ത് മാത്രം പ്രദേശത്തേക്ക് വരികയും തെരഞ്ഞെടുപ്പ് വാഗ്ദാനമായി പാലം നിര്‍മിക്കുമെന്ന് പറഞ്ഞ് പോവുകയല്ലാതെ ഇതുവരെ പ്രാഥമിക പ്രവര്‍ത്തനങ്ങള്‍ പോലും നടത്താന്‍ അധികൃതര്‍ തയാറായിട്ടില്ലന്നാണ് നാട്ടുകാര്‍ പറയുന്നു.
പഞ്ചായത്ത് അധികൃതര്‍ ഇടപെട്ട് പടിഞ്ഞാറത്തറയും കപ്യാര്‍കുന്നും തമ്മില്‍ ബന്ധിപ്പിക്കുന്നതിനായി പാലം നിര്‍മിക്കണമെന്നതാണ് പ്രദേശവാസികളുടെ ആവശ്യം.