കട്ടാങ്ങല്‍(കോഴിക്കോട്): കട്ടാങ്ങലില്‍ പഴയ ധന്യ തിയേറ്ററിന് സമീപം പെട്രോള്‍ പമ്പില്‍ സിനിമാ സ്‌റ്റൈലില്‍ തോക്ക് ചൂണ്ടി മോഷണം. മോഷ്ടാവ് 108000 രൂപ കവര്‍ന്നു.

ബുധനാഴ്ച രാത്രി പത്തു മണിയോടെയാണ് സംഭവം. കുന്ദമംഗലം പൊലിസ് അന്വേഷണം ആരംഭിച്ചു.

പമ്പിലേയും സമീപത്തെ കടകളിലേയും സി.സി.ടി.വി പരിശോധിച്ച് വരികയാണെന്നും സി.സി.ടി.വി വിവരങ്ങള്‍ കണ്ടെത്താന്‍ സൈബര്‍ സെല്ലിന്റെ സഹായം തേടിയിട്ടുണ്ടെന്നും കുന്ദമംഗലം പൊലിസ് സബ് ഇന്‍സ്‌പെക്ടര്‍ വിശ്വനാഥന്‍ പറഞ്ഞു.

നോര്‍ത്ത് അസി. കമ്മീഷണര്‍ പ്രിഥിരാജ് ആണ് കേസ് അനേഷണത്തിന് നേതൃത്വം നല്‍കുന്നത്. അദ്ദേഹം ഇന്നലെ രാത്രി തന്നെ സ്ഥലം സന്ദര്‍ശിച്ചിരുന്നു. ഫിംഗര്‍ പ്രിന്റ് വിദഗ്ധരും ഡോഗ് സ്‌കോഡും സ്ഥലത്തെത്തി പരിശോധന നടത്തി.

കനത്ത ഇടിയും മിന്നലും ഉണ്ടായതിനെ തുടര്‍ന്ന് പമ്പ് നേരത്തെ അടച്ച് പണം തിട്ടപ്പെടുത്തി വീട്ടിലേക്ക് പോകാന്‍ ഒരുങ്ങുമ്പോള്‍ മുഖമൂടി ധരിച്ച ഒരാള്‍ തോക്കുമായി പമ്പിന്റെ പിറക് വശത്തുക്കൂടി ഓഫിസില്‍ കയറുകയായിരുന്നുവെന്ന് ഉടമ അനിഷ പറഞ്ഞു.

സംഭവം നടക്കുമ്പോള്‍ പമ്പ് ഉടമയും ഒരു ജീവനക്കരനുമാണ് ഉണ്ടായിരുന്നത്. തോക്കു ചൂണ്ടി ആംഗ്യ ഭാഷയിലാണ് പണം ആവശ്യപ്പെട്ടത്. പമ്പില്‍ ഉണ്ടായിരുന്ന ചില്ലറ അടക്കമുള്ള മുഴുവന്‍ പണവും മോഷ്ടാവ് കൊണ്ടുപോയെന്നു പമ്പുടമ പൊലിസില്‍ മൊഴി നല്‍കി.