കല്‍പ്പറ്റ: എസ്.എസ്.എല്‍.സി പരീക്ഷാഫലത്തില്‍ സംസ്ഥാനത്ത് ഏറ്റവും പിന്നിലായെങ്കിലും പ്ലസ്ടു ഫലത്തില്‍ ജില്ലക്ക് നേട്ടം. 86.18 വിജയശതമാനമുള്ള ജില്ല സംസ്ഥാനത്ത് മൂന്നാം സ്ഥാനത്താണ്.
86.75 ശതമാനമുള്ള കണ്ണൂരാണ് ഒന്നാം സ്ഥാനത്ത്. 86.57 ശതമാനവുമായി കോഴിക്കോടാണ് രണ്ടാം സ്ഥാനത്ത്. 60 സ്‌കൂളുകളിലായി 9402 പേരാണ് ജില്ലയില്‍ പരീക്ഷ എഴുതിയത്. ഇതില്‍ 7798 പേര്‍ ഉപരിപഠനത്തിന് അര്‍ഹരായി. 341 പേര്‍ക്കാണ് മുഴുവന്‍ വിഷയങ്ങളിലും എപ്ലസ് ഉള്ളത്. ഓപ്പണ്‍ സ്‌കൂള്‍ വിഭാഗത്തില്‍ 34.84 ശതമാനമാണ് വിജയം. ജില്ലയില്‍ 1969 പേരാണ് രജിസ്റ്റര്‍ ചെയ്തിരുന്നത്. ഇതില്‍ 1929 പേര്‍ പരീക്ഷ എഴുതിയതില്‍ 672 പേരാണ് ഉപരിപഠനത്തിന് അര്‍ഹത നേടിയത്. 11 പേര്‍ മുഴുവന്‍ മാര്‍ക്കും നേടി ജില്ലക്ക് അഭിമാനമായി. 341 വിദ്യാര്‍ഥികള്‍ മുഴുവന്‍ വിഷയത്തിലും എ പ്ലസ് നേടി. കീര്‍ത്തന ബി. ശിവദാസ്(ഡബ്ല്യു.ഒ.എച്ച്.എസ് പിണങ്ങോട്), അശ്വതി ജെ സാറ(നടവയല്‍ സെന്റ് തോമസ് ഹയര്‍ സെക്കന്‍ഡറി സ്‌കൂള്‍), ബേസില്‍ സജി, ആസിഫ് മുഹമ്മദ്, എമിന്‍ ഷോബി, ശ്വേത മരിയ സണ്ണി, മാളവിക മിത്ര, സാന്ദ്ര ആന്‍ ടോം(സേക്രഡ് ഹാര്‍ഡ് എച്ച്.എസ്.എസ്, ദ്വാരക), സാഗാ പി.എസ്, നന്ദന സുരേഷ്(ജി.എച്ച്.എസ്.എസ് മീനങ്ങാടി), ആനറ്റ് ജോര്‍ജ്(സെന്റ് കാതറിന്‍സ് എച്ച്.എസ്.എസ് പയ്യമ്പള്ളി) എന്നിവരാണ് 1200ല്‍ 1200 മാര്‍ക്കും നേടിയത്. ഇതില്‍ പത്ത് പേരും സയന്‍സ് ഗ്രൂപ്പിലാണ് വിജയം നേടിയത്. നടവയല്‍ സെന്റ് തോമസ് ഹയര്‍ സെക്കന്‍ഡറി സ്‌കൂളിലെ അശ്വതി ജെ. സാറ ഹ്യുമാനിറ്റീസ് ഗ്രൂപ്പിലാണ് സമ്പൂര്‍ണ വിജയം നേടിയത്.