കുട്ടികള്‍ക്കും സ്ത്രീകള്‍ക്കുമെതിരേ പീഡനങ്ങളും അതിക്രമങ്ങളും വര്‍ധിച്ചു വരുന്ന സാഹചര്യത്തില്‍ ബോധവല്‍ക്കരണങ്ങള്‍ക്കും ഉദ്‌ബോധനങ്ങള്‍ക്കുമപ്പുറം പ്രതികളായി പിടിക്കുന്നവരെ വേഗത്തില്‍ അന്വേഷണം പൂര്‍ത്തിയാക്കി കര്‍ശന ശിക്ഷാ നടപടികള്‍ക്കു വിധേയമാക്കണം.

മതമേലാളന്മാരുടെയും ആത്മീയതയുടെയും അധ്യാപക-വിദ്യാര്‍ഥി ബന്ധത്തിന്റെയും സംരക്ഷകരുടെയും ആത്മസൗഹൃദത്തിന്റെയും ആട്ടിന്‍തോലണിഞ്ഞ ചെന്നായ രൂപത്തില്‍ ചെയ്തുകൊണ്ടിരിക്കുന്ന കുറ്റകൃത്യങ്ങളും അതിലേക്കെത്തിച്ചേരാന്‍ കാരണമാവുന്ന മറ്റു പ്രവര്‍ത്തനങ്ങളും എഴുതിവച്ച നിയമങ്ങള്‍കൊണ്ടു നിയന്ത്രിക്കാന്‍ സാധിക്കില്ല. ഉന്നതരുള്‍െപ്പടെ പ്രതികളായി പിടിക്കപ്പെടുമ്പോള്‍ സാമൂഹ്യസേവനമെന്ന പേരില്‍ മുകളില്‍നിന്നുള്ള ചിലരുടെ ഇടപെടലുകളാണ് ഇത്രയേറെ പീഡനങ്ങളും കുറ്റകൃത്യങ്ങളും പെരുകാന്‍ കാരണം. ഇത്തരം വക്കാലത്തുകാരെ പ്രത്യേകം നിരീക്ഷിക്കുകയും അത്തരക്കാരുടെ എല്ലാ ഇടപാടുകളും അന്വേഷണവിധേയമാക്കി കഴിയുമെങ്കില്‍ പീഡനക്കുറ്റത്തില്‍ പ്രതിയായി ചേര്‍ക്കുകയും വേണം. പ്രതികള്‍ ഏതു മതത്തില്‍പെട്ടവരാണെങ്കിലും സമൂഹത്തില്‍ എന്തു സ്ഥാനം അലങ്കരിക്കുന്നവരാണെങ്കിലും തൂക്കിലേറ്റല്‍, ഷണ്ഡീകരണം പോലുള്ള ശിക്ഷകള്‍ നടപ്പാക്കാന്‍ നിയമഭരണസംവിധാനങ്ങള്‍ക്കു സാധിക്കണം.

പ്രൊട്ടക്ഷന്‍ ഓഫ് ചിള്‍ഡ്രന്‍ ഫ്രം സെക്ഷ്വല്‍ ഒഫന്‍സ് ആക്ട് ഉള്‍പ്പെടെ ഉണ്ടായിട്ടും കുറ്റകൃത്യങ്ങള്‍ വര്‍ധിച്ചുകൊണ്ടിരിക്കുന്ന സാഹചര്യത്തില്‍ പ്രതികള്‍ക്കു ഷണ്ഡീകരണം ഉള്‍െപ്പടെ ശിക്ഷകള്‍ നല്‍കണമെന്ന 2012 ലെ മദ്രാസ് ഹൈക്കോടതി നിരീക്ഷണം എന്തുകൊണ്ടും ശ്രദ്ധേയമാണെന്നു പറയാതെ വയ്യ.