കരുനാഗപ്പള്ളി: കാറില്‍ സ്പിരിറ്റ് കടത്തിയതിന് പിടിയിലായ മൂന്നംഗ സംഘത്തെ കൊല്ലം എക്‌സൈസിന്റെ കസ്റ്റഡിയില്‍ വിട്ടു. പ്രതികളെ അസി. എക്‌സൈസ് കമ്മിഷണറുടെ നേതൃത്വത്തില്‍ ചോദ്യം ചെയ്തുവരികയാണ്. കരുനാഗപ്പള്ളി എക്‌സൈസ് സംഘമാണ് പ്രതികളെ പിടികൂടിയത്.
കഴിഞ്ഞ അഞ്ചിന് ഓച്ചിറ ഭാഗത്തുവച്ച് വാഹന പരിശോധനയ്ക്കിടെ കാറില്‍ കടത്തികൊണ്ട് 495 ലിറ്റര്‍ സ്പിരിറ്റുമായി തൃശൂര്‍ ഊരകം സ്വദേശി ഷിഹാബുദ്ദീനെ പിടികൂടിയിരുന്നു. ഇതിന്റെ ഭാഗമായിട്ട് നടന്ന അന്വേഷണത്തിലാണ് മൂന്ന പ്രതികളേയും കാറും എക്‌സൈസ് പിടികൂടിയത്. ആലപ്പുഴയില്‍ വാടകയ്ക്ക് താമസിക്കുന്ന തൃശൂര്‍ മുണ്ടൂര്‍ സ്വദേശി ജോമോന്‍, തലോര്‍ സ്വദേശി ബൈജു, കരവന്നൂര്‍ സ്വദേശി സനല്‍ എന്നിവരാണ് പിടിയിലായത്. ഉന്നതങ്ങളില്‍ നിന്നുള്ള നിര്‍ദേശത്തിന്റെ അടിസ്ഥാനത്തില്‍ എക്‌സൈസ് ഇന്‍സ്‌പെക്ടര്‍ എസ്.അജിദാസിന്റെ നേതൃത്വത്തില്‍ നടത്തിയ അന്വേഷണത്തിലാണ് പ്രതികള്‍ പിടിയിലായത്. വിവിധ സ്ഥലങ്ങളിലേക്ക് സ്പിരിറ്റ് എത്തിച്ച് കൊടുക്കുന്ന സംഘത്തിലെ പ്രധാനികളാണ് ഇവരെന്ന് എക്‌സൈസ് സംഘം അറിയിച്ചു. മറ്റുള്ളവര്‍ക്ക് സംശയം തോന്നാതിരിക്കാന്‍ ഇവര്‍ ആഢംബര കാറുകളാണ് ഉപയോഗിക്കുന്നത്. കേസില്‍ കൂടുതല്‍ പ്രതികള്‍ക്കായി അന്വേഷണം തുടരുമെന്നും എക്‌സൈസ് സംഘം അറിയിച്ചു.