ലണ്ടന്‍: അട്ടിമറികളൊന്നും നടന്നില്ലെങ്കില്‍ വിംബിള്‍ഡണ്‍ ടെന്നീസ് പുരുഷ സിംഗിള്‍സിന്റെ സെമിയില്‍ ലോക ഒന്നാം നമ്പര്‍ താരം സെര്‍ബിയയുടെ നൊവാക് ദ്യോക്കോവിചിനെ നേരിടുക സ്വിസ് ഇതിഹാസം റോജര്‍ ഫെഡറര്‍. കലണ്ടര്‍ സ്ലാം ലക്ഷ്യമിടുന്ന ദ്യോകോവിചും എട്ടാം വിംബിള്‍ഡണ്‍ കിരീടം നേടി റെക്കോര്‍ഡിടാനൊരുങ്ങുന്ന റോജര്‍ ഫെഡററും തമ്മില്‍ ഇത്തവണ നേരത്തെ ഏറ്റുമുട്ടുന്നു എന്നതു ശ്രദ്ധേയമാണ്. കഴിഞ്ഞ രണ്ടു തവണയും ഫെഡററെ ഫൈനലിലാണ് ദ്യോക്കോ നേരിട്ടത്. രണ്ടു തവണയും സെര്‍ബിയന്‍ താരം കിരീടം സ്വന്തമാക്കുകയായിരുന്നു. ദ്യോക്കോവിച് ആദ്യ റൗണ്ടില്‍ ബ്രിട്ടീഷ് താരം ജെയിംസ് വാര്‍ഡിനെ നേരിടും.
ലോക രണ്ടാം നമ്പര്‍ താരം ആന്‍ഡി മുറെയ്ക്ക് അട്ടിമറി നേരിട്ടില്ലെങ്കില്‍ സെമിയില്‍ എതിരാളിയായി വരിക സ്റ്റാനിസ്ലാസ് വാവ്‌റിങ്ക ആയിരിക്കും. വിംബിള്‍ഡണിലെ ആദ്യ റൗണ്ട് പോരില്‍ മുറെ ബ്രിട്ടന്റെ ലിം ബ്രോഡിയെ നേരിടും. മുന്‍ ചാംപ്യനായ മുറെ ലോക റാങ്കിംഗില്‍ 234ാം സ്ഥാനത്തുള്ള ബ്രോഡിക്കെതിരെ ആദ്യമായാണ് മത്സരിക്കുന്നത്. തിങ്കളാഴ്ചയാണ് വിംബിള്‍ഡണ്‍ മത്സരങ്ങള്‍ക്ക് തുടക്കമാകുന്നത്.