കൊല്‍ക്കത്ത: പശ്ചിമ ബംഗാളിലെ തൃണമൂല്‍ കോണ്‍ഗ്രസ് നേതൃത്വം കോഴ വാങ്ങിയെന്നുള്ള നാരദ ന്യൂസ് ഒളിക്കാമറ അന്വേഷണ റിപ്പോര്‍ട്ടില്‍ കൊല്‍ക്കൊത്ത ഹൈക്കോടതി സിബിഐ അന്വേഷണത്തിന് ഉത്തരവിട്ടു. 72 മണിക്കൂറിനകം പ്രാഥമിക അന്വേഷണം പൂര്‍ത്തിയാക്കണമെന്നും കോടതി നിര്‍ദേശിച്ചു. ആവശ്യമെങ്കില്‍ എഫ്.ഐ.ആര്‍. രജിസ്റ്റര്‍ ചെയ്യാനും കോടതി നിര്‍ദ്ദേശിച്ചിട്ടുണ്ട്. സി.ബി.ഐ അന്വേഷണം ആവശ്യപ്പെട്ടുള്ള വിവിധ പൊതു താല്‍പര്യ ഹരജികള്‍ പരിഗണിക്കവെയാണ് കോടതി ഉത്തരവ്.

2016ലെ നിയമസഭാ തെരഞ്ഞെടുപ്പിന് ഏതാനും ദിവസങ്ങള്‍ക്ക് മുമ്പാണ് തൃണമൂല്‍ കോണ്‍ഗ്രസ് എംപിമാര്‍, സംസ്ഥാന മന്ത്രിമാര്‍, മുന്‍ മന്ത്രിമാര്‍ തുടങ്ങിയ പാര്‍ട്ടി നേതൃനിര തന്നെ കോഴ വാങുന്ന ഒളിക്യാമറ ദൃശ്യങ്ങള്‍ നാരദ ന്യൂസ് പുറത്ത് വിട്ടത്.

കൊല്‍ക്കത്ത ഹൈക്കോടതി ആക്ടിങ് ചീഫ് ജസ്റ്റിസ് നിഷിതാ മാത്രെ, ജസ്റ്റിസ് ടി ചക്രബോര്‍ത്തി എന്നിവരടങ്ങിയ ഡിവിഷന്‍ ബഞ്ചാണ്് അന്വേഷണത്തിന് ഉത്തരവിട്ടിരിക്കുന്നത്.

നാരദ ന്യൂസ് പുറത്ത് വിട്ട് ഒളി കാമറ ദൃശ്യങ്ങള്‍ യഥാര്‍ത്ഥമാണെന്ന് കേന്ദ്ര ഫോറന്‍സിക് ലബോറട്ടറി നേരത്തെ കണ്ടെത്തിയിരുന്നു.