ലണ്ടന്‍: ഇംഗ്ലീഷ് പ്രീമിയര്‍ ലീഗിൽ തോൽവികളിൽ കരകയറാതെ സിറ്റി.മുൻ വർഷത്തെ ചാംപ്യന്‍മാരായ മാഞ്ചസ്റ്റര്‍ സിറ്റിയുടെ നിലവിലെ അവസ്ഥ കണ്ട് അമ്പരന്ന് നില്‍ക്കുന്ന ആരാധകര്‍ക്ക് ഇന്നും നിരാശയുടെ ദിനമായിരുന്നു. ഉനായ് എംറിയുടെ അസ്റ്റന്‍ വില്ലയാണ് ഇന്ന് സിറ്റിയെ വീഴ്ത്തിയത്. എവേ പോരാട്ടത്തില്‍ പെപ് ഗ്വാര്‍ഡിയോളയും സംഘവും 2-1നാണ് പരാജയം രുചിച്ചത്.

കഴിഞ്ഞ കളിയില്‍ മാഞ്ചസ്റ്റര്‍ ഡെർബിയിൽ യുനൈറ്റഡിനോടു പരാജയപ്പെട്ടാണ് സിറ്റി എവേ പോരിനിറങ്ങിയത്. പക്ഷേ ഇന്നും നിരാശയായിരുന്നു ഫലം.രണ്ടുപകുതികളിലും ഗോളുകള്‍ നേടി  അസ്റ്റന്‍ വില്ല വിജയം നേടുകയായിരുന്നു. അവസാന ഘട്ടത്തില്‍ ഒരു ഗോള്‍ മടക്കി ആശ്വാസം കൊള്ളാന്‍ മാത്രമാണ് ഇന്നത്തെ പോരില്‍ സിറ്റിക്ക് ആകെ സാധിച്ചത്.

16ാം മിനിറ്റില്‍ ജോണ്‍ ഡ്യുറനാണ് വില്ലയ്ക്ക് വേണ്ടി ​ഗോൾ കണ്ടെത്തിയത്. 65ാം മിനിറ്റില്‍ മോര്‍ഗന്‍ റോജേഴ്‌സ് രണ്ടാം ഗോളും നേടി. സിറ്റിയുടെ ആശ്വാസ ഗോള്‍ ഇഞ്ച്വറി സമയത്ത് ഫില്‍ ഫോഡനാണ് നേടിയത്.