കോഴിക്കോട്: പ്രവാസ ജീവിതം അവസാനിപ്പിച്ചു നാട്ടില്‍ താമസമാക്കിയവര്‍ക്ക് മാര്‍ഗ നിര്‍ദേശവുമായി എസ്.കെ.എസ്.എസ്.എഫ്. പ്രവാസികള്‍ക്കായി സര്‍ക്കാര്‍ ആവിഷ്‌കരിച്ച പദ്ധതികള്‍ വിശദീകരിക്കാനും പുതിയ സംരംഭങ്ങള്‍ പരിചയപ്പെടുത്തുവാനുമായി നടന്ന ക്യാംപില്‍ നിരവധി പ്രവാസികളും പ്രവാസ ജീവിതം അവസാനിപ്പിച്ചവരും സംബന്ധിച്ചു. കോഴിക്കോട് സ്‌പോര്‍ട്‌സ് കൗണ്‍സില്‍ ഹാളില്‍ എസ്.കെ.എസ്.എസ്.എഫ് പ്രവാസി വിങാണ് ക്യാംപ് സംഘടിപ്പിച്ചത്. 

സുപ്രഭാതം മാനേജിങ് എഡിറ്റര്‍ നവാസ് പൂനൂര്‍ ഉദ്ഘാടനം ചെയ്തു. മലയാളിയുടെ സ്വപ്നങ്ങള്‍ക്കു നിറം പകര്‍ന്ന പ്രവാസം കേരളത്തിന്റെ സാമ്പത്തികവും സാംസ്‌കാരികവുമായ ജീവിതത്തെ മാറ്റി മറിച്ചിരുന്നുവെങ്കിലും ഇന്ന് പ്രവാസ ലോകത്തു നിന്നു വരുന്ന വാര്‍ത്തകള്‍ പ്രതീക്ഷ നല്‍കുന്നതല്ലെന്ന് നവാസ് പൂനൂര്‍ അഭിപ്രായപ്പെട്ടു. എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ് റഫീഖ് അഹമ്മദ് അധ്യക്ഷനായി. നോര്‍ക്കറൂട്ട്‌സ് സീനിയര്‍ ഗ്രേഡ് അസിസ്റ്റന്റ് എ പ്രശാന്ത്, ഗുലാം ചെറുവാടി എന്നിവര്‍ ക്ലാസെടുത്തു.
കുഞ്ഞാലന്‍കുട്ടി ഫൈസി, സുബൈര്‍ മാസ്റ്റര്‍ കുറ്റിക്കാട്ടൂര്‍, ഒ.പി.എം അഷ്‌റഫ്, ഫൈസല്‍ ഫൈസി മടവൂര്‍ സംസാരിച്ചു.