ന്യൂഡല്‍ഹി: മുന്‍ കേന്ദ്രമന്ത്രിയും നയതന്ത്രജ്ഞനും മുസ്‌ലിം ലീഗിന്റെ ദേശീയ നേതാവുമായിരുന്ന അന്തരിച്ച ഇ.അഹമ്മദിനെ കുറിച്ചുള്ള ഡോക്യുമെന്ററിയുടെ ചിത്രീകരണം തുടങ്ങി. കോണ്‍സ്റ്റിറ്റിയൂഷന്‍ ക്ലബില്‍ മുന്‍ പ്രധാനമന്ത്രി ഡോ. മന്‍മോഹന്‍ സിങ് സ്വിച്ച് ഓണ്‍ നിര്‍വഹിച്ചു. ഏറെ കാലം ഇ.അഹമ്മദിന്റെ കര്‍മ മണ്ഡലമായിരുന്ന ഡല്‍ഹിയില്‍ കെ.എം.സി.സി സംഘടിപ്പിച്ച ഇ. അഹമ്മദ് അനുസ്മരണ ചടങ്ങിലാണ് ഡോക്യുമെന്ററി സ്വിച്ച് ഓണ്‍ നടന്നത്.
കോഴിക്കോട് ആസ്ഥാനമായുള്ള ' മൈന്റ് ഇറ്റ് ' ക്രിയേഷന്‍സിന്റെ ബാനറില്‍ പാറയ്ക്കല്‍ അബ്ദുള്ള എം.എല്‍.എ, അഹമ്മദ് അടിയോട്ടില്‍ സൈനുല്‍ ആബ്ദിന്‍, പി.കെ അബ്ദുല്‍ റഹിം എന്നിവര്‍ ചേര്‍ന്നാണ് 'അഹമ്മദ് നാമ 'എന്ന് പേരിട്ടിരിയ്ക്കുന്ന ഡോക്യുമെന്ററി നിര്‍മിക്കുന്നത്. ഛായാഗ്രഹണം പ്രശസ്ത ബോളിവുഡ് കാമറാമാന്‍ രവി യാദവും സംവിധാനം മൊയ്തു താഴത്തും നിര്‍വഹിയ്ക്കും. നുസ്രത്ത് ജഹാന്‍ പ്രൊജക്ട് ഡിസൈനറായ ഡോക്യുമെന്ററിയുടെ രചന വിനു എബ്രഹാമിന്റേതാണ്.