കല്‍പ്പറ്റ: അനധികൃത പാര്‍ക്കിങ് കാരണം ഗതാഗത തടസം പതിവായ കല്‍പ്പറ്റ മത്സ്യ-മാംസ മാര്‍ക്കറ്റിനോട് ചേര്‍ന്നുള്ള കല്‍പ്പറ്റ-പടിഞ്ഞാറത്തറ റോഡില്‍ ആര്‍.ടി.ഒയുടെ വാഹനം മണിക്കൂറുകളോളം നിര്‍ത്തിയിട്ടത് ഗതാഗത തടസമുണ്ടാക്കി.
കല്‍പ്പറ്റ- പടിഞ്ഞാറത്തറ റോഡില്‍ മുനിസിപ്പല്‍ ടൗണ്‍ ഹാളിലേക്കുള്ള റോഡ് തിരിയുന്നിടത്താണ് ഇന്നലെ ഉച്ചക്ക് മണിക്കൂറുകളോളം ആര്‍.ടി.ഒയുടെ വാഹനം നിര്‍ത്തിയിട്ടത്. ഇതേ സ്ഥലത്തുവെച്ചാണ് പടിഞ്ഞാറത്തറ ഭാഗത്തേക്കുള്ള യാത്രക്കാരെ കയറ്റുന്നതും ഇറക്കുന്നതും. ഡ്രൈവര്‍ പോലുമില്ലാതെയാണ് ആര്‍.ടി.ഒ വാഹനം ഉച്ച മുതല്‍ മണിക്കൂറുകളോളം ഇവിടെ പാര്‍ക്ക് ചെയ്തത്. ഇരുഭാഗത്ത് നിന്നുമെത്തുന്ന വാഹനങ്ങള്‍ക്ക് സുഖമമായി സഞ്ചരിക്കാനുള്ള സ്ഥലമുണ്ടെങ്കിലും അനധികൃത പാര്‍ക്കിങ് കാരണം ഈ ഭാഗത്ത് പലപ്പോഴും വാഹനങ്ങളുടെ നീണ്ട നിര തന്നെയുണ്ടാകും. എന്നിരിക്കെയാണ് നിയമം പാലിക്കേണ്ട ഉദ്യോഗസ്ഥര്‍ തന്നെ ഇത്തരത്തില്‍ നിയമലംഘനം നടത്തി വകുപ്പ് വാഹനം പാര്‍ക്ക് ചെയ്ത് ഗതാഗത തടസമുണ്ടാക്കിയത്.