ന്യൂഡല്‍ഹി: കര്‍ണാടകയില്‍ ഗവര്‍ണറെ ഉപയോഗപ്പെടുത്തി ബി.ജെ.പി നടത്തിയ രാഷ്ട്രീയ നീക്കത്തിന് മറ്റു സംസ്ഥാനങ്ങളില്‍ പകരം വീട്ടാനൊരുങ്ങി കോണ്‍ഗ്രസും ആര്‍.ജെ.ഡിയും രംഗത്ത്. ഗോവയില്‍ സമാനമായ തന്ത്രം പരീക്ഷിക്കാനാണ് കോണ്‍ഗ്രസ് ഒരുങ്ങുന്നത്. ബിഹാറില്‍ ആര്‍.ജെ.ഡിയാണ് ഗവര്‍ണറെ പ്രതിക്കൂട്ടിലാക്കാനുള്ള നീക്കത്തിന് ചുക്കാന്‍ പിടിക്കുന്നത്. ഗോവയില്‍ ഇപ്പോള്‍ പ്രതിപക്ഷത്തുള്ള കോണ്‍ഗ്രസ് ഗവര്‍ണര്‍ മൃദുല സിന്‍ഹയെ കാണും. ബിഹാറില്‍ ഗവര്‍ണര്‍ സത്യപാല്‍ മാലിക്കിനേയാണ് ആര്‍.ജെ.ഡി കാണുക.
ഗോവയില്‍ കഴിഞ്ഞ വര്‍ഷം നടന്ന തെരഞ്ഞെടുപ്പില്‍ ഏറ്റവും വലിയ ഒറ്റകക്ഷിയായെങ്കിലും കോണ്‍ഗ്രസിന് അധികാരത്തില്‍ എത്താനായിരുന്നില്ല.
40 അംഗ നിയമസഭയില്‍ 16 എം.എല്‍.എമാരാണ് കോണ്‍ഗ്രസിനുള്ളത്. ഈ എം.എല്‍.എമാര്‍ക്കൊപ്പം ഗവര്‍ണറെ കണ്ട് സര്‍ക്കാര്‍ രൂപീകരിക്കാനുള്ള അവസരം നല്‍കണമെന്നാണ് കോണ്‍ഗ്രസ് ഗവര്‍ണറോട് ആവശ്യപ്പെടുക.
ഗോവയില്‍ ബി.ജെ.പിക്ക് 14 സീറ്റാണുള്ളത്. എം.ജി.പി, ജി.എഫ്.പി, എന്‍.സി.പി എന്നീ കക്ഷികളേയും മൂന്ന് സ്വതന്ത്രന്മാരേയും കൂട്ടുപിടിച്ചാണ് ബി.ജെ.പി ഇവിടെ സര്‍ക്കാരുണ്ടാക്കിയത്.
ബിഹാറില്‍ 2015ല്‍ നടന്ന തെരഞ്ഞെടുപ്പില്‍ 243 അംഗ നിയമസഭയില്‍ 80 സീറ്റ് നേടി ആര്‍.ജെ.ഡി ഏറ്റവും വലിയ ഒറ്റകക്ഷി ആയി.
എന്നാല്‍ 53 സീറ്റുള്ള ബി.ജെ.പി ജെ.ഡി.യുവിന്റെ 73ഉം എല്‍.ജെ.പിയുടെ രണ്ടും ആര്‍.എല്‍.എസ്.പി രണ്ടും നാല് സ്വതന്ത്രരെയും കൂട്ടുപിടിച്ച് സര്‍ക്കാരുണ്ടാക്കുകയായിരുന്നു. ബീഹാറിലെ എന്‍.ഡി.എ സര്‍ക്കാരിനെ പിരിച്ചുവിട്ട് തങ്ങളെ ക്ഷണിക്കണമെന്നായിരിക്കും ആര്‍.ജെ.ഡി ആവശ്യപ്പെടുക.