കണ്ണൂര്‍: മുന്‍ മുഖ്യമന്ത്രി ഇ.കെ നായനാരുടെ സ്മരണയ്ക്കായി കണ്ണൂര്‍ ബര്‍ണശ്ശേരിയില്‍ സി.പി.എം സ്ഥാപിച്ച നായനാര്‍ അക്കാദമി നാളെ നാടിനു സമര്‍പ്പിക്കും. വൈകിട്ട് നാലിന് അക്കാദമി ഉദ്ഘാടനവും നായനാരുടെ പ്രതിമ അനാച്ഛാദനവും സി.പി.എം ജനറല്‍സെക്രട്ടറി സീതാറാം യെച്ചൂരിയും അക്കാദമി മ്യൂസിയം കെട്ടിടോദ്ഘാടനം മുഖ്യമന്ത്രി പിണറായി വിജയനും നിര്‍വഹിക്കുമെന്നു മാനേജിങ് ട്രസ്റ്റി കൂടിയായ സംസ്ഥാന സെക്രട്ടറി കോടിയേരി ബാലകൃഷ്ണന്‍, ജില്ലാസെക്രട്ടറി പി. ജയരാജന്‍, സംസ്ഥാനകമ്മിറ്റി അംഗം കെ.പി സഹദേവന്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.
കമ്യൂണിസ്റ്റ് പാര്‍ട്ടിയുടെ ചരിത്രം ഉള്‍ക്കൊള്ളുന്ന മ്യൂസിയമായിരിക്കും അക്കാദമിയുടെ ആകര്‍ഷണം. രാജ്യത്ത് എവിടെയും ഇത്തരത്തിലൊരു മ്യൂസിയം സി.പി.എം സ്ഥാപിച്ചിട്ടില്ല. ജനങ്ങള്‍ക്കു ഉപയോഗപ്രദമാകുന്ന റഫറന്‍സ് ലൈബ്രറി, വിവിധ സമ്മേളനങ്ങള്‍ക്കും സാംസ്‌കാരിക പരിപാടികള്‍ക്കും ഉപയോഗിക്കാവുന്ന ഹാള്‍, ഓപ്പണ്‍ എയര്‍ ഓഡിറ്റോറിയം എന്നിവയെല്ലാം ഉള്‍ക്കൊള്ളുന്ന സ്മാരക സമുച്ഛയമാണു വിഭാവനം ചെയ്യുന്നത്. ആധുനിക രീതിയിലുള്ള മ്യൂസിയം ഒഴികെ മറ്റെല്ലാ പ്രവൃത്തികളും പൂര്‍ത്തിയായി. ദൈനംദിന പ്രവര്‍ത്തനങ്ങള്‍ക്ക് ആവശ്യമായ ചുമതലക്കാരെ അക്കാദമി നിശ്ചയിക്കും.
പഠനക്ലാസുകള്‍, സെമിനാറുകള്‍, വിവിധ കോഴ്‌സുകള്‍ എന്നിവ സംഘടിപ്പിക്കും. ദേശീയ, സാര്‍വദേശീയതലത്തില്‍ അറിയപ്പെടുന്ന പണ്ഡിതന്മാരെ പങ്കെടുപ്പിച്ചുള്ള പരിപാടികളും സംഘടിപ്പിക്കും.
45000 ചതുരശ്ര അടി വിസ്തൃതിയില്‍ മൂന്നുനിലകളിലാണ് അക്കാദമി സജ്ജമാക്കുന്നത്. ഒന്നാംനിലയുടെ പ്രവൃത്തി പൂര്‍ണമായി നടന്നുകഴിഞ്ഞു.രണ്ടും മൂന്നും നിലകളില്‍ ചില പ്രവൃത്തികള്‍ ബാക്കിയുണ്ട്. ഓപ്പണ്‍ എയര്‍ തിയറ്ററില്‍ 1200 പേര്‍ക്ക് ഇരുന്ന് പരിപാടികള്‍ കാണാം. വലിയരീതിയിലുള്ള പരിപാടികള്‍ക്ക് അനുയോജ്യമായ സൗകര്യങ്ങളാണ് ഒരുക്കിയതെന്നും നേതാക്കള്‍ വ്യക്തമാക്കി. തിരുവേപ്പതി സ്പിന്നിങ് മില്‍ അടച്ചുപൂട്ടിയപ്പോള്‍ പാര്‍ട്ടി വാങ്ങിയ സ്ഥലത്താണു നായനാരുടെ സ്മരണയ്ക്കു അക്കാദമി ഒരുങ്ങിയത്.