ചെറുതുരുത്തി: കേരളം മുഴുവന്‍ ബന്ധങ്ങളുള്ള കഞ്ചാവ് മാഫിയയിലെ മൂന്ന് യുവാക്കളെ അഞ്ച് കിലോ കഞ്ചാവുമായി ചെറുതുരുത്തിയില്‍ വെച്ച് പൊലിസ് സംഘം അറസ്റ്റ് ചെയ്തു. ചെറുതുരുത്തി പുതുശ്ശേരി ലക്ഷം വീട് കോളനി അത്തിക്കപറമ്പില്‍ ബനേഷ് കണ്ണന്‍ (29), കോഴിക്കോട് പുതിയാറ പൂനത്തില്‍ വീട്ടില്‍ സെമീര്‍ സാലു(30), കലാമണ്ഡലം ലക്ഷംവീട് കോളനിയില്‍ പാളയംകോട്ടുകാരന്‍ ഷെജീര്‍ (28) എന്നിവരാണ് പിടിയിലായത്. രഹസ്യ വിവരത്തിന്റെ അടിസ്ഥാനത്തില്‍ ഒന്നര കിലോ കഞ്ചാവുമായി ബനേഷിനെയാണ് ആദ്യം അറസ്റ്റ് ചെയ്തത്. ചോദ്യം ചെയ്യലിനിടയിലാണ് ബനേഷിന് കഞ്ചാവ് എത്തിച്ച് കൊടുക്കുന്ന സെമീര്‍ സാലുവിനെ കുറിച്ച് വിവരം ലഭിയ്ക്കുന്നത്.
തുടര്‍ന്ന് നടത്തിയ പരിശോധനയിലാണ് റിവര്‍ റിട്രീറ്റ് വഴിയില്‍ നിന്ന് ബൈക്കില്‍ വരുകയായിരുന്ന സെമീര്‍ സാലു വിനേയും, ഷെജീറിനേയും പിടികൂടിയത്. ആന്ധ്രാ പ്രദേശിലെ അനക പിള്ളി ചോളനാരത്ത് നിന്നാണ് യുവാക്കള്‍ വന്‍തോതില്‍ കഞ്ചാവ് എത്തിച്ചിരുന്നത്. സെമീര്‍ സാലുവിനെതിരെ മലപ്പുറം, കോഴിക്കോട് ജില്ലകളില്‍ നിരവധി കേസുകളുണ്ട്. ബനേഷ് ചെറുതുരുത്തി പൊലിസ് സ്‌റ്റേഷനില്‍ നിരവധി അടിപിടി കേസുകളിലെ പ്രതിയാണ്.