പയ്യന്നൂര്‍: ഏഴിമല നാവിക അക്കാദമിയിലെ മാലിന്യ സംസ്‌ക്കരണ പ്ലാന്റ് നിയമം ലംഘിച്ചിട്ടാണ് പ്രവര്‍ത്തിക്കുന്നതെങ്കില്‍ കര്‍ശന നടപടികള്‍ എടുക്കുന്നതിന് മലീനീകരണ നിയന്ത്രണ ബോര്‍ഡും സര്‍ക്കാറും തയാറാകണമെന്ന് ബി.ജെ.പി സംസ്ഥാന ജനറല്‍ സെക്രട്ടറി കെ സുരേന്ദ്രന്‍. രാമന്തളിയില്‍ നാവിക അക്കാദമി മാലിന്യ പ്ലാന്റ് അടച്ചുപൂട്ടണമെന്നാവശ്യപ്പെട്ട് ജന ആരോഗ്യ സംരക്ഷണ സമിതി നടത്തുന്ന അനിശ്ചിതകാല സമരപന്തല്‍ സന്ദര്‍ശിക്കുകയായിരുന്നു അദ്ദേഹം.ഇക്കാര്യത്തില്‍ മലിനീകരണ നിയന്ത്രണ നേവല്‍ അധികൃതര്‍ പറയുന്നത് മാലിന്യപ്രശ്‌നത്തിന്റെ ഉത്തരവാദികള്‍ തങ്ങളല്ല എന്നാണ്. ഉത്തരവാദിത്വത്തെ സംബന്ധിച്ച് ശാസ്ത്രീയമായ പരിശോധന നടത്തി ജനങ്ങളെ ബോധ്യപ്പെടുത്താനുള്ള ഉത്തരവാദിത്വം സര്‍ക്കാരിനുണ്ട്. കേന്ദ്ര മന്ത്രിമാര്‍ അടക്കമുള്ള ദേശീയ നേതാക്കള്‍ക്ക് മുന്നില്‍ വിഷയം അവതരിപ്പിക്കുന്നതിന് സമരസമിതിക്ക് ആവശ്യമായ എല്ലാ സഹായവും ചെയ്യാന്‍ തയാറാണെന്നും സുരേന്ദ്രന്‍ പറഞ്ഞു. കെ. രഞ്ചിത്ത്, സി.കെ. രമേശന്‍, പി രാമകൃഷ്ണന്‍ എന്നിവരും ഒപ്പമുണ്ടായിരുന്നു. അക്കാദമി സന്ദര്‍ശിച്ച് നേവല്‍ അധികൃതരുമായി കെ സുരേന്ദ്രന്‍ ചര്‍ച്ച നടത്തി.