റിയാദ്: ഈ വര്‍ഷം ഇതുവരെയായി ആറു മില്യനടുത്ത് വിശ്വാസികള്‍ ഉംറ തീര്‍ഥാടനത്തിനായി എത്തി.
മുഹറം ഒന്നു മുതല്‍ റമദാന്‍ തുടങ്ങുന്നതു വരെയുള്ള കണക്കുകള്‍ പ്രകാരം 5735830 തീര്‍ഥാടകരാണ് വിശുദ്ധ ഉംറ നിര്‍വഹിക്കാനായി പുണ്യഭൂമിയില്‍ എത്തിച്ചേര്‍ന്നത്. വിവിധ രാജ്യങ്ങളില്‍ നിന്നുള്ളവരുടെ വരവിന് റമദാന്‍ തുടങ്ങിയതോടെ ഗണ്യമായ വര്‍ധനവാണ് ഉണ്ടായിരിക്കുന്നത്.
ഈ വര്‍ഷം തീര്‍ഥാടകരുടെ എണ്ണത്തില്‍ മുന്‍ വര്‍ഷത്തേക്കാളും വര്‍ധനവ് ഉണ്ടാകുമെന്നാണ് കരുതുന്നത്. കരമാര്‍ഗം അയല്‍ രാജ്യങ്ങളില്‍ നിന്നെത്തുന്നവരെ സ്വീകരിക്കാനും എമിഗ്രേഷന്‍ നടപടികള്‍ എളുപ്പമാക്കാനും വിവിധ സേവനങ്ങള്‍ക്കുമായി മദീനത്തുല്‍ ഹുജ്ജാജുകള്‍ തുറന്നിട്ടുണ്ട്. കൂടാതെ കര, വ്യോമ മാര്‍ഗം എത്തുന്നവരുടെ നടപടികള്‍ക്കും കൂടുതല്‍ സജ്ജീകരണങ്ങള്‍ ഒരുക്കിയിട്ടുണ്ട്.
അതേസമയം, ഉംറ വിസയില്‍ എത്തുന്ന വിശ്വാസികള്‍ നിശ്ചിത കാല ശേഷം തിരിച്ചു പോകണമെന്നു പാസ്‌പോര്‍ട്ട് വിഭാഗം മുന്നറിയിപ്പ് നല്‍കി. ഉംറ വിസയിലുള്ളവര്‍ മക്ക,മദീന, ജിദ്ദ നഗരികള്‍ക്ക് പുറത്തുപോകുന്നതിനും അനുവാദമില്ല. റമദാനില്‍ ഇരു ഹറമുകള്‍ക്ക് പരിസരങ്ങളിലുള്ള ലോഡ്ജുകളിലും വന്‍ തിരക്കാണ് അനുഭവപ്പെടുന്നത്. ലോഡ്ജുകളുടെ വാടകയിലും ഗണ്യമായ വര്‍ധനവുണ്ടായിട്ടുണ്ട്.