കോതമംഗലം: ആയക്കാട് കവലയില്‍ കവര്‍ച്ചക്കാരുടെ വിളയാട്ടം.തിങ്കളാഴ്ച്ച പുലര്‍ച്ചയോടെയാണു മോഷണം നടന്നിരിക്കുന്നത്. രണ്ട് മെഡിക്കല്‍ ഷോപ്പുകളിലും ബേക്കറിയില്‍ നിന്നുമായി അര ലക്ഷത്തോളം രൂപയാണു മോഷ്ടാക്കള്‍ കവര്‍ന്നെടുത്തത്.
കൃഷ്ണകുമാര്‍, ജയരാജ് എന്നിവരുടെ ഉടമസ്ഥതയിലുള്ള ഭീമാ മെഡിക്കല്‍സില്‍ നിന്നും 21000 രൂപയും, ഡോ. സാം പോളിന്റെ ഉടമസ്ഥതയിലുള്ള കരുണാ മെഡിക്കല്‍സില്‍ നിന്നും പതിനായിരത്തോളം രൂപയും സജീവിന്റെ ഉടമസ്ഥതയിലുള്ള റിലാക്‌സ് ബേക്കറിയില്‍ നിന്നും ആറായിരത്തോളം രൂപയും പ്രാഥമിക കണക്കെടുപ്പില്‍ നഷ്ടപെട്ടിട്ടുണ്ട്.
ഷട്ടറിന്റെ പൂട്ട് തകര്‍ത്താണു മോഷ്ടാക്കള്‍ കടകളില്‍ പ്രവേശിച്ചത്.അറുത്ത താഴും ആയു ധങ്ങളും മോഷ്ടാക്കള്‍ കൈവശംകൊണ്ടുപോയി. രാത്രി പന്ത്രണ്ട് മണി വരെ പരിസരത്തെ കടകളില്‍ ആളുകളുണ്ടായിരുന്നു.രാത്രിയില്‍ പല തവണ കറണ്ട് പോയിരുന്നു. അര്‍ധരാത്രിയോടെ കവലയിലൂടെ ആരോ ഓടി മാറുന്നത് ശ്രദ്ധയില്‍പെട്ട സമീപവാസി ടോര്‍ച്ച് അടിച്ച് പരിശോധിച്ചിരുന്നു. അതിന് ശേഷമാണ് ഒളിച്ചിരുന്ന മോഷ്ടാക്കള്‍ മോഷണം നടത്തിയിരിക്കുന്നത്.കവലയില്‍ പ്രകാശം കൂടിയ സ്ട്രീറ്റ് ലൈറ്റ് സ്ഥാപിക്കണമെന്നും, രാത്രി കാലങ്ങളിലെ പവര്‍ കട്ട് ഒഴിവാക്കി പൊലിസ് പടോളിങ് കാര്യക്ഷമമാക്കണമെന്നുമാണ് നാട്ടുകാരുടെ ആവശ്യം.